شي جينپيڭ قازاقستانعا مەملەكەتتىك ساپارمەن بارادى ءارى شاڭحاي سەلبەستىك ۇيىمىنا مۇشە ەلدەر باسشىلارى القالار كەڭەسىنىڭ 17 - رەتكى ءماجىلىسى مەن استانا ارنايى الەمدىك كورمەسىنىڭ اشىلۋ سالتاناتىنا قاتىناسادى

سىرتقى ىستەر مينيسترلىگى جۇڭگولىق - شەتەلدىك اقپارات قۇرالدارىنا ارناپ قۇلاق قاعىس ەتۋ ءماجىلىسىن وتكىزىپ قاتىستى جاعدايلاردى تانىستىردى

شينحۋا اگەنتتىگىنىڭ 5 - ماۋسىمدا بەيجيڭنەن بەرگەن حابارى. سىرتقى ىستەر مينيسترلىگى 5 - ماۋسىم كۇنى جۇڭگولىق - شەتەلدىك اقپارات قۇرالدارىنا ارناپ قۇلاق قاعىس ەتۋ ءماجىلىسىن وتكىزدى. سىرتقى ىستەر مينيسترىنىڭ كومەكشىسى لي حۇيلاي ءتوراعا شي جينپيڭنىڭ مەملەكەتتىك ساپارمەن قازاقستانعا باراتىنى جانە شاڭحاي سەلبەستىك ۇيىمىنا مۇشە ەلدەر باسشىلارى القالار كەڭەسىنىڭ 17 - رەتكى ءماجىلىسى مەن استانا ارنايى الەمدىك كورمەسىنىڭ اشىلۋ سالتاناتىنا قاتىناساتىنى تۋرالى تىلشىلەردىڭ سۇراۋىنا جاۋاپ بەردى.

لي حۇيلاي مىنالاردى ءبىلدىردى: بۇل جۇڭگو جاقتىڭ «ءبىر بەلدەۋ، ءبىر جول» حالىقارالىق سەلبەستىك جوعارى دارەجەلى باسشىلار تالقى مىنبەرىن ءساتتى وتكىزگەننەن كەيىنگى ءتوراعا شي جينپيڭنىڭ شەتەلگە العاشقى ساپارى، جۇڭگونىڭ بيىل قازاقستان مەن ەۆرازيا وڭىرىندەگى اسا ماڭىزدى ديپلوماتيالىق ءىس - شارالارىنىڭ ءبىرى، جۇڭگونىڭ قازاقستان سياقتى ەۆرازيا ەلدەرىمەن قارىم - قاتىناسىنىڭ دامۋىن نىعايتىپ، سان سالالى ءوزارا ءتيىمدى سەلبەستىكتى تەرەڭدەتىپ، شاڭحاي سەلبەستىك ۇيىمىنىڭ ۇزدىكسىز تۇردە اقاۋسىز، تۇراقتى دامۋىن ىلگەرىلەتۋدە ماڭىزدى مانگە يە.

ءبىرىنشى، قازاقستانعا مەملەكەتتىك ساپار جونىندە

لي حۇيلاي مىنالاردى ءبىلدىردى: قازاقستان − جۇڭگونىڭ دوس كورشىسى جانە جاپپاي ستراتەگيالىق سەرىكتەسى، جۇڭگو جاقپەن «ءبىر بەلدەۋ، ءبىر جولدى» قاتار قۇرىپ، حالىقارالىق وندىرىستىك قۋات سەلبەستىگىن ورىستەتۋشى ماڭىزدى سەلبەستىك سەرىكتەسى. ديپلوماتيالىق قاتىناس ورناتقان 25 جىلدان بەرى، جۇڭگو مەن قازاقستاننىڭ قارىم - قاتىناسى تۇراقتى، اقاۋسىز دامىپ، كورشىلىك دوستىق پەن ءوزارا پايدالى سەلبەستىكتىڭ جارقىن ۇلگىسىنە اينالدى. بۇل ءتوراعا شي جينپيڭنىڭ قازاقستانداعى 3 - رەتكى ساپارى. وسى ساپارىندا، ءتوراعا شي جينپيڭ نازاربايەۆ زۇڭتۇڭ وتكىزگەن ءبىر قىدىرۋ مەملەكەتتىك ءىس - شارالارعا قاتىسادى، اتاپ ايتساق، قارسى الۋ مۇراسىمى، ءىرىلى - ۇساقتى كەڭەستەر، ەكى جاقتى حۇجاتتارعا قول قويىلۋ مۇراسىمى، تىلشىلەرمەن جۇزدەسۋ، مەملەكەتتىك قوناعاسى، ت.ب. ەكى مەملەكەت باسشىسى تاراپتاردىڭ قارىم - قاتىناسى، دامۋ ستراتەگيالارىن ۇشتاستىرۋ، «ءبىر بەلدەۋ، ءبىر جولدى» قاتار قۇرۋ، ءتۇرلى سالاداعى ءوزارا پايدالى سەلبەستىك جانە ەكى جاقتىڭ دا نازارىن اۋدارعان حالىقارالىق، وڭىرلىك ماسەلەلەر تۋراسىندا ىشكەرىلەي پىكىر اۋىسىپ، «جۇڭگو مەن قازاقستاننىڭ بىرلەسكەن مالىمدەمەسىن» قول قويىپ جاريالايدى. ەكى مەملەكەت باسشىسى جۇڭگو مەن قازاقستاننىڭ ەۆرازيا شەكارالىق تاسىمال بويىنشا بەينەبايلانىس مۇراسىمىنا قاتىناسىپ، ەكونوميكا - ساۋدا، فينانس، سۋ قۇرىلىسى، ت.ب سالالار بويىنشا ماڭىزدى سەلبەستىك حۇجاتتارىنا قول قويىلۋىنا كۋا بولادى.

لي حۇيلاي مىنالاردى ءبىلدىردى: قازاقستانداعى ساپارى كەزىندە، ءتوراعا شي جينپيڭ ارنايى شاقىرۋ بويىنشا استانا ارنايى الەمدىك كورمەسىنىڭ اشىلۋ سالتاناتىنا قاتىناسادى. بۇل ورتا ازيا ەلدەرىنىڭ الەمدىك كورمەنى العاش رەت وتكىزۋى، الەمدىك كورمەنىڭ تاقىرىبى − «بولاشاق قۋاتى»، جۇڭگو جاق 1000 شارشى مەترلىك ەڭ ۇلكەن سارايدا كورمەگە بەلسەنە ات سالىسادى. ءتوراعا شي جينپيڭنىڭ الەمدىك كورمەنىڭ اشىلۋ سالتاناتىنا قاتىسۋى − قازاقستاننىڭ كورمەنى وتكىزۋىنە كورسەتىلگەن پارمەندى قولداۋ، سونداي - اق بۇل جۇڭگو جاقتىڭ حالىقارالىق قۋات كوزدەرىنە، اسىرەسە، جاڭا ەنەرگيا كوزدەرى ماسەلەسىنە ءمان بەرىپ، نازار اۋدارىپ وتىرعانىن كورسەتەدى. ءتوراعا شي جينپيڭنىڭ وسى جولعى ساپارىنىڭ، ءسوز جوق، تولىق تابىستى بولاتىنىنا، جۇڭگو مەن قازاقستان قارىم - قاتىناسىنىڭ دەڭگەيىن كوتەرىپ، ءوزارا ساياسي سەنىمدىلىكتى تەرەڭدەتىپ، «ءبىر بەلدەۋ، ءبىر جول» سەلبەستىگىن ىلگەرىلەتۋگە قۋاتتى قوزعاۋشى كۇش ۇستەيتىنىنە كامىل سەنەمىز.

ەكىنشى، شاڭحاي سەلبەستىك ۇيىمىنىڭ استانا باس قوسۋىنا قاتىناساتىنى جونىندە

 لي حۇيلاي مىنالاردى ءبىلدىردى: شاڭحاي سەلبەستىك ۇيىمى قۇرىلعاننان بەرى، قاشاندا وڭىرلىك حاۋىپسىزدىكتى قورعاپ، ورتاق دامۋدى ىلگەرىلەتۋدى ءوز بورىشى ەتىپ كەلەدى. 16 جىلدان بەرگى دامۋ ساپارىندا، مۇشە ەلدەر «شاڭحاي رۋحىن» بەرىك ۇستانىپ، ساياسي، حاۋىپسىزدىك، ەكونوميكا، گۋمانيتارلىق سالالارىنداعى سەلبەستىكتى تىڭعىلىقتى ىلگەرىلەتىپ، وڭىرلىك جانە حالىقارالىق ىستەردە سىندارلى رول اتقارىپ، حالىقارالىق قارىم - قاتىناستاردىڭ سەلبەستىكتىك پەن ءوزارا تيىمدىلىككە نەگىزدەلگەن جاڭا ۇلگىسىن كورسەتتى. وسى رەتكى باس قوسۋ كەزىندە، ءتوراعا شي جينپيڭ ءار ەلدىڭ باسشىلارىمەن بىرگە ارنايى ساۋىق كەش، بەيرەسمي قوناعاسى، ءىرىلى - ۇساقتى كەزدەسۋلەر، قول قويۋ مۇراسىمى، قارسى الۋ قوناعاسى سياقتى قيمىلدارعا قاتىناسادى ءارى باس قوسۋعا قاتىسقان قاتىستى مەملەكەت باسشىلارىمەن ەكى جاقتى كەزدەسۋلەر وتكىزەدى. ءتوراعا شي جينپيڭ ۇيىمعا مۇشە ەلدەردىڭ باسشىلارىمەن بىرگە «استانا جارناماسىنا» قول قويادى جانە ونى جاريالايدى، ءماجىلىستىڭ «اقپاراتتىق مالىمدەمەسىن» جاريالايدى، «شاڭحاي سەلبەستىك ۇيىمىنىڭ ۇشقارىلىققا قارسى تۇرۋ شارتى» سياقتى حۇجاتتار مەن ءۇندىستان مەن پاكيستانعا شاڭحاي سەلبەستىك ۇيىمىنا مۇشە ەل مارتەبەسىن بەرۋ تۋرالى، ت.ب قاۋلىعا قول قويادى. باس قوسۋدان كەيىن، جۇڭگو جاق شاڭحاي سەلبەستىك ۇيىمىنىڭ كەزەكتى ءتوراعا ەلى اتانادى ءارى 2018 - جىلى باس قوسۋ وتكىزەدى، تاراپتار جۇڭگو جاقتىڭ ءتوراعا مەملەكەت رەتىندەگى جۇمىستارىنا مول ءۇمىت ارتىپ وتىر.

لي حۇيلاي مىنالاردى ءبىلدىردى: بيىل − «شاڭحاي سەلبەستىك ۇيىمىنىڭ ۋستاۆىنا» قول قويىلعانىنا 15 جىل، «شاڭحاي سەلبەستىك ۇيىمىنا مۇشە ەلدەردىڭ ۇزاق مەرزىمدىك كورشىلىك دوستىق سەلبەستىگى تۋرالى شارتقا» قول قويىلعانىنا 10 جىل تولادى، ءۇندىستان مەن پاكيستان شاڭحاي سەلبەستىك ۇيىمىنا كىرۋ تارتىپتەرىن ورىنداپ بولادى، ۇيىمنىڭ سەلبەستىك مۇمكىندىكتەرى مەن حالىقارالىق ىقپالى ونان سايىن كوتەرىلە تۇسەدى. سونىمەن قاتار، حالىقارالىق جانە وڭىرلىك جاعدايداعى تۇراقسىز، تۇرلاۋسىز فاكتورلار دا مەن مۇندالاپ تۇر، شاڭحاي سەلبەستىك ۇيىمىنىڭ دامۋى جاڭا سىناقتارعا ءدوپ كەلىپ وتىر. وسى رەتكى باس قوسۋدىڭ نەگىزگى تاقىرىبى: ءبىرىنشى، شاڭحاي سەلبەستىك ۇيىمىنىڭ دامۋ جاعدايىن، مىندەتتەرى مەن بولاشاعىن تالقىعا سالۋ؛ ەكىنشى، حالىقارالىق جانە وڭىرلىك ماڭىزدى ماسەلەلەر جونىندە پىكىر اۋىسۋ. ءتوراعا شي جينپيڭ مەملەكەت باسشىلارىمەن وسى ايتىلعان تاقىرىپتار توڭىرەگىندە جاڭا جاعدايدا حاۋىپ پەن قاتەرگە قول ۇستاسا توتەپ بەرۋ، ورتاق حاۋىپسىزدىك پەن تۇراقتىلىقتى جانە دامۋ مەن وركەندەۋدى ىلگەرىلەتۋدىڭ جاڭا وي جۇلگەسى مەن جاڭا شارالارى جونىندە ىشكەرىلەي تالقى جۇرگىزەدى. جۇڭگو جاق «شاڭحاي رۋحىن» ۇزبەي ساۋلەلەندىرىپ، شاڭحاي سەلبەستىك ۇيىمىنىڭ بەرەكە - بىرلىگى مەن ءوزارا سەنىمدىلىگىن بەكەمدەۋ، حاۋىپسىزدىك، ەكونوميكا، گۋمانيتارلىق، ۇيىم قۇرىلىسى، سىرتقى بايلانىستار سياقتى سالالارداعى سەلبەستىكتى تەرەڭدەتۋ تۋراسىندا دارىپتەمەلەر مەن قۋاتتامالار ۇسىنىپ، جۇڭگو جاقتىڭ ءتوراعا مەملەكەت كەزىندەگى وي جوبالارىمەن تانىستىرىپ، ءار جاقپەن بىرگە شاڭحاي سەلبەستىك ۇيىمىنىڭ جاڭا دامۋدى ىسكە اسىرۋىن ىلگەرىلەتەدى.