قۋات نۇكەي ۇلى
قابا اۋداندىق پارتكوم قارت كادرلار مەكەمەسى
18099767077
سىڭعىرلى سەزىمدەر
ادەمى-اۋ
قىران كورگەن قىزىلدار تۇسكە ورلەيدى ادەمى –اۋ ،
قىزىلداردىڭ قىزىعىن كەش كورمەيدى ادەمى-اۋ .
قىلاڭ ۇرىپ قىردى اسىپ كەتەم دەمە ادەمى-اۋ ،
بولات توپشى مۇز بالاق دەس بەرمەيدى ادەمى-اۋ .
ات تەرلەتىپ وزىڭە تالاي كەلدىم ادەمى-اۋ ،
مولدىرەگەن كوزىڭە قاماي بەردىڭ ادەمى-اۋ .
الىپ ۇشقان جۇرەكتىڭ جەتەگىندە ادەمى-اۋ ،
الما ءجۇزدى وڭىڭنەن اراي كوردىم ادەمى –اۋ .
كوكىرەگىڭ كوزىنەن ساراي كوردىم ادەمى-اۋ ،
ىنتىزار بوپ سارايعا جاناي كەلدىم ادەمى-اۋ .
قول ۇستاسىپ جاتپەنەن كەتكەن دەيدى ادەمى-اۋ ،
كەتكەن جاققا قۇلازىپ قاراي بەردىم ادەمى-اۋ .
جەڭەشەم
اق توتىداي جەڭەشەم ،
سىرلاسامىن كەڭەسەم .
وكپەلەمەس ءسىڭىلىڭ ،
سەنى گۇلگە تەڭەسەم .
ابىسىنعا باس بولعان ،
داستارقانعا اس تولعان .
ارىستانداي اعانى ،
نازىمەنەن باسقارعان .
كوڭىلى سايىن دالاداي ،
اڭقاۋلىعى بالاداي .
اق وتاۋ بولسىن اق وردا ،
قىزىعىڭ ماڭگى تاراماي .
قارا تالعا بارايىن
قارا تالعا بارايىن قايىنشىلاپ ،
قارتتارعا سالەمدەسىپ ءجايىن سۇراپ .
تۇلپارلارى توپ جارعان بۇل مەكەندە ،
ءبىر توپ بالا شاۋىپ ءجۇر تايىن سىناپ .
كوكشىل ورمان نار تالى ،
دانگە تولعان القابى .
قارا تالدان تاپقامىن ،
ءتاتتى الماداي قالقانى .
جانارى-اي قىزدارىنىڭ مولدىرەگەن ،
قوس بۇرىمدى ،كويلەگى كولبىرەگەن .
ادەبىڭنەن اينالدىم توتىلار-اۋ ،
كورگەن جان كوپ قاراعان ، ەلجىرەگەن .
تۇڭكەلى مەكەن ەدىڭ قارا تالىم ،
سامالىڭ سيپاپ وتكەن الاقانىڭ .
ءبىر جۇرتىما كيەلى قونىس بولعان ،
نۇرلى بولسىن قاشاندا بولاشاعىڭ .
بوز ادىردىڭ ءبىر گۇلى
تولعان ايداي اجارى ،
قايسى تاۋدىڭ مارالى .
كەزىككەلى ءوزىڭ مەن ،
جۇرەگىم مەنىڭ جارالى .
بوز ادىردىڭ ءبىر گۇلى ،
بوز دالانىڭ بۇلبۇلى .
اتتىڭ باسىن بۇرامىن ،
اۋىلىڭا ءبىر كۇنى .
ءتىل قاتا الماي دارالاپ ،
دەرتىم قالاي تاراماق .
ءسال ايالدا جانىما ،
جۇرەگىم تاپسىن قاناعات .
ەكى جاققا كەتەمىز ،
ەكى اۋىلعا جەتەمىز .
وسى اندى ايتىپ جۇرەيىك ،
سىڭار داۋىستا ەكەمىز .
ۋاقىت ءبىزدى بولەدى ،
تاعدىرعا ادام كونەدى .
اۋەلەگەن ساعىنىش ،
مەن بوپ سەنى وبەدى .
加载评论内容,请稍等......