حۋا حۋدە

كۇيەۋىممەن اجىراسقان سول ءبىر جىل، مەن ءۇشىن عۇمىرىمداعى ەڭ ءبىر جابىرقاڭقى جىل بولدى. سوت مەكەمەسى ۇكىم شىعارعاندا، بەس جاستاعى ۇلىمىزدى كۇيەۋىمە قاراتتى، سەبەبى تىم قاراپايىم، مەن بولسام جاقىندا عانا جۇمىستان بوساعانمىن، بالانى باعىپ- قاعاتىن قۋاتىم جوق ەدى.

ءبىر تۇندە، بارلىعىنان ايىرىلىپ شىعا كەلدىم. توركىنىمە بارۋعا باتپادىم، ۇيتكەنى مەنىڭ شارۋام، كۇيگەلەك ءارى ءبىرمويىن اكەمدى الدە نەشە رەت رەنجىتىپ بولعان. اكەم باستابىندا- اق مەنىڭ ونىمەن باس قۇراۋىما قوسىلماعان، ال مەن ەرەگەسكەندەي ونىمەن باس قۇراپ تىندىم؛ كەيىن كەلە اكەم مەنىڭ ونىمەن اجىراسۋىما قارسى بولدى، مەن بولسام بولماي ءجۇرىپ باسىمدى اشىپ الدىم؛ اكەم مەنىڭ بالانىڭ باعىپ- قاعىۋ ۇقىعىنا تالاسىۋىما قارسى كەلدى، مەن باعىپ- قاعىۋ ۇقىعىنا قول جەتكىزە الماسام دا، ءبىراق اجىراسقان كۇيەۋىم، بۇل ۇقىقتان يگىلىكتەنۋىمە جول بەرىپ، بالانى ۋاقىتتىق مەنىڭ باعا تۇرۋىما تاپسىردى، سودان سوڭعى رەت اكەمە جولىققانىمدا، ماعان سۇق ساۋساعىن نۇقىپ تۇرىپ: « ەگەر سەن مىنا قاسقىردىڭ بولتىرىگىن باعام دەيدى ەكەنسىڭ، مەنىڭ شاڭىراعىمنان شىنىنىڭ شەتىن تىستەيمىن دەپ ويلاما! ءوزىنىڭ قالاي كۇن كورەتىنىن بىلمەي ءجۇرىپ، تاعى ءبىر ماسىلدى سۇيرەپ جۇرگەنىن قاراي گور!»،- دەپ وت الىپ، قوپاعا تۇسكەن بولاتىن.

مەن 150 يۋان اقشا تاپسىرىپ، قۋىقتاي عانا قاڭىلتىر ءۇيدى ۋاقىتتىق جالعا الىپ، قۇرعاق جۋىۋ دۇكەنىن اشتىم. قاڭىلتىر ءۇيدىڭ ءتورت بۇرىشىنا جەل اڭقىلداپ، ءار كۇنى تاڭەرتەڭ كوزىمدى اشقانىمدا، جاپسارىنان كۇن ساۋلەسى قولىن سوزىپ تۇراتىن دا، تاڭنىڭ اتقانىن بىلە قوياتىنمىن. سول جىلعى قىس جانىما قاتتى باتتى، قول - اياعىمىز جىلىنباعانىمەن قويماي اشىعىپتا جۇردىك، ۇنەمى ءۇي مايىن تاپسىرۋعادا شامامىز كەلمەي قالاتىن ، قاتقان نان مەن قاتىقسىز كوجەگە كۇنىمىز ءتۇىسپ قالدى دا، كەنەۋسىز تاماقتان ۇلىمنىڭ جۇزىنەن نۇر تايدى.

ءبىر كۇنى، شەشەم قالىمدى بىلمەك بولىپ جاسىرنىپ كەلىپ جولىقتى، ۇلىم ەكەۋمىزدىڭ تاڭەرتەڭگى ساعات 10دا، قاتقان ناندى قايناعان سۋمەن ايداپ، ازەر ورازامىزدى اشىپ وتىرعانىمىزدى كورىپ، كوز جاسىن سىعىمداپ الدى. سودان: « ءجۇر، ۇيگە قايتايىق، شەشەڭ سەندەرگە ىستىق تاماق ىستەپ بەرسىن. اكەڭە ۇشىراسىپ قالام دەپ قورقپا، ول ءار كۇنى وسى شاقتا باقشاعا بارىپ باسقالاردىڭ شاھىمات ويىنىن كورەدى، ۇيدە جوق»،- دەدى.

شەشەم ىستەگەن كوجەدەن، ۇلىم كىشكەنە توستاقانمەن ءۇش توستاقان تاۋىستى؛ كوجە ىشىندە بىتەۋ جومىرتقا، بو ساي، قىزاناق بار ەكەن. شەشەم جىيەنىنىڭ اشىققان ابدانداي بولعان سۇرقىن كورىپ، كوز جاسىن توگە وتىرىپ: « بۇدان كەيىن ءار كۇنى 9 جارىمدا ۇيگە كەلىپ تاماقتانىپ تۇرىڭدار، كەلمەيتىن بولساڭدار، مەن ءوزىم ىستەپ اپارىپ تۇراتىن بولامىن»،- دەدى.

سول كۇننەن باستاپ، مەن ءار كۇنى تاڭەرتەڭگى 9 جارىمدا ۇلىمدى جەتەلەپ بارىپ، توركىنىمنەن تاماقتانىپ تۇردىم، اكەمە بىردە- ءبىر جول ۇشىراسپادىم.

ءبىر كۇنى، جاۋىن سىركىرەپ قۇيىپ تۇردى، مەن ىشتەي « اكەم بۇگىن ءسوزسىز جاڭبىردان قورعالاپ ۇيدەن شىققان جوق»،- دەپ ويلادىم دا، ۇلىمدى ەرتىپ بارۋدان باس تارتتىم. ءبىراق ۇلىم ناعاشى اپام ىستەگەن تاماعىن ىشەمىن دەپ جىلاپ- ەڭىرەپ، قيعىلىق سالىپ مازامدى الىپ جىبەردى، سودان امالسىز ونى جەتەلەپ توركىنىم وتىرعان عىيماراتقا قاراي اياڭداپ، ىرگەسىنە كەلگەنىم سول ەدى، شەشەمنىڭ عىيمارات سامالدىعىنا شىعىپ الىپ، ماڭايىنا كوز سالىپ تۇرعانىن كوردىم، ول ءبىزدى كورگەن جەردەن، قولىمەن يشاراتتاپ دەرەۋ ۇيگە كىرىۋىمىزدى بۇيىردى. ءبىز ۇيگە كىرگەن سوڭ شەشەم: « انا شال دالا بەزەر بولىپ الدى، ۇيگە قۇيرىق قويىپ وتىرعاندى قويدى. بۇدان كەيىن جاۋىندى كۇنى بولسادا كەلە بەرىڭدەر، مولشەرى وعان ۇشىراسا قويمايسىڭدار»،-دەدى.

تاماقتان كەيىن، ۇلىمدى جەتەلەپ قايتىپ كەلە جاتىپ، اكەمدى كورۋگە اڭسارىم اۋىپ تۇرىپ الدى، مەن باسىمدى اشقالى، ول كىسىمەن جۇزدەسپەگەن ەدىم.

( سوڭى )

قابا اۋداندىق ساناق مەكەمەسىنەن: سەرجان قابەت ۇلى

تەلەفون نومىرى: 13999459594