مىڭباي ءىبىراھيم (ىبىراي) ۇلى 1956-جىلى اقپاندا قابا اۋدانى اققايىڭ ارالىندا تۋعان. 1964−1969-جىلدار دۇڭفىڭ كوممۋنا مالشىلىق باستاۋشىندا، 1969−1972-جىلدار دۇڭفىڭ كوممۋنا اۋىل شارۋاشىلىق ورتالاۋىنان وقىعان. 1972-جىلى 4-ايدان 1974-جىلى 8-ايعا دەيىن جەڭىس كوممۋناسى 3-مال اتىرەتىندە قايتالاي تاربيەدە بولعان. 1974−1976-جىلدار التاي ايماعىنىڭ قابا اۋدانى قىزىلقايىڭدا اشقان سىفان مەكتەبىنىڭ 1-قارار جالپىلىق كلاسىنان وقىپ،ورتا تەحنيكوم تاۋىسىپ، 1976−1990-جىلدار دەيىن سارتام اۋىلدىق 1-ورتالاۋدا وقىتۋشى بولعان. 1990−1993-جىلدار سارتام اۋىلدىق مالشىلىق جاتاقتى باستاۋىش مەكتەبىندە وقۋ ءبولىم جانە مەكتەپ باستىعىندىق مىندەت وتەگەن. 1993−1998-جىلدار سارتام اۋىلى وقىتۋ رايونىندا ىنسپەكتور جانە ورىنباسار وقىتۋ رايون باستىعىندىق مىندەت وتەگەن. 1998−2007-جىلدار 9 جىلدىق تۇزىمدەگى سارتام اۋىلدىق مالشىلىق جاتاقتى مەكتەبىنىڭ باستىعىندىق مىندەت وتەگەن. 2008−2012-جىلدار قابا اۋداندىق وقۋ–اعارتۋ مەكەمەسىندە ارالاپ تەكسەرۋشىلىك مىندەت وتەپ، 2012-جىلى 8-ايدا داڭقپەن زەينەتكە شىققان. قارت پەداگوگ 1981−1982-جىلدار التاي ايماقتىق وقۋشىلاردى تاربيەلەۋ مەكتەبىنەن، 1987−-جىلدار شينجياڭ وقۋ-اعارتۋ شۋەيۋنىنىڭ ماتەماتيكا كاسىبىنەن، 1994−1995-جىلدار ىلە وقۋ-اعارتۋ شۋيۋانىنىڭ اكىمشىلىك باسقارۋ كاسىبىنەن ءبىلىم تولىقتاعان. ارناۋلى كۋرس ماعلۇماتىنا يە، كاسىپتىك اتاعى ورتا مەكتەپتىڭ جوعارى دارەجەلى وقىتۋشىسى. 1974-جىلى 1-ايدا كوممۋىنيستىك جاستار وداعىنا، 1986-جىلى 10-ايدا داڭقپەن ج ك پ-عا مۇشە بولعان. مىكەڭ باستاۋىشتىڭ 4-كلاسىنان باستاپ ورتلاۋ بىتىرگەنگە دەيىنگى ارالىقتا مادەنيەت توڭكەرىسىنىڭ ىقپالىنان تەرەڭدەپ پاندىك ءبىلىم الا الماعان. ال، سىفانعا قابىلدانعاندا جوعارى مەكتەپتەردى اۋىل-قىستاققا ءتۇسىرۋ ساياساتى بويىنشا، التاي ايماعى سىفان مەكتەبىنىڭ قابا اۋدانى قىزىلقايىڭ قىستاعىنان اشقان تۇڭعىش كەزەكتى جالپىلىق كلاسىنان وقىعاندا، ەكى جىل وقىتۋشىلاردىڭ ۇيىن سالۋ، ەگىن ەگۋ، مەكتەپ اسحاناسىنىڭ قاجەتىن قامداۋ قاتارلى ەڭبەكپەن شۇعىلدانىپ، تەك قىس ايلارىندا وقىتۋشىلاردىڭ قۇراپ-سۇراپ وقۋلىقسىز وتكەن لەكسياسىنان، ورتالاۋ 1-جىلدىعىنىڭ ساۋياسىنا جەتەر-جەتپەس بىلىممەن مەكتەپ ءبىتىرىپ، ورتالاۋ مەكتەپكە ماتەماتيكا وقىتۋشسى بولۋدا، وتەتىن ساباعىن الدىمەن ءوزى ۇيرەنۋ، ونان سوڭ وقۋشىلارعا ۇيرەتۋ تاسىلىمەن ۇزدىك وقىتۋ ناتيجەسىن جاراتقان تاڭداۋلى ۇستاز بولدى. كەيىن ءبىلىم تولىقتاپ كەلىپ اكىمشىلىك جۇمىسقا ارالاسىپ، سارتام اۋىلدىعىنىڭ «نىسانالى وقىتۋ»، «وقۋشىلار ساپاسىن باعالاۋ»، «مەكتەپ باسقارۋ ساپاسىن باعالاۋ»، «ەكى نەگىز وقۋ-اعارتۋى»، «قوس ءتىل وقىتۋى»، «وقىتۋ تۇيىندەرىن جيناقتاپ باسقارۋ»، «اۋىل-قىستاقتاردا وقۋ الدىنداعى تاربيەنى جولعا قويۋ»، «تومەن شارت-جاعدايداعى مالشىلىق جاتاقتى مەكتەپتى جاقسى باسقارۋ» قاتارلى وقۋ-اعارتۋ رەفورماسىن جالپىلاستىرۋدا بەلسەندى ىزدەنىس، جاپالى امالي سىناقتار جاساپ، اقىل-پاراسات، كۇش-قايراتىن وقۋ-اعارتۋ ىسىنە ارناعان ۇزدىك مەكتەپ باسشىلارىنىڭ تيپتىك ۋاكىلى بولىپ جەتىلدى. ول وتە قاراپايىم، مەيىرىمدى، جاقسىلىعىن ايامايتىن كوپشىل كىسى. بۇيرىقشا نەكەلەنگەن جۇبايى قاماريا (قاماش) ءبىر ۇيدە جەتىم قالعان 5 جەتىم بالانىڭ ۇلكەنى بولعاندىقتان، ۇيلەنگەننەن كەيىن 4 بالدىزىن قارسى ۇيىنە كىرگىزىپ الادى دا، قولىنداعى اكە-شەشەسىن، اكەسىنىڭ ۇيلەنبەگەن ءىنىسى ءشارىپ اقساقالدى قوسقاندا 4 وتباسى ءبىر ءۇيلى جانداي بەرەكەلى وتىرادى. بالدىزدارىنىڭ وقۋ، كاسىپتەنۋ، دوحتىرعا كورىنۋ، ۇيلەنۋ جۇمىستارىنىڭ بارلىعىن ءوز قولىمەن اكە ورنىندا ورىندادى. تۇرمىستا قورمال وتاعاسى عانا ەمەس، تۋىس-تۋعانعا اقىلشى-قورعان، قولداۋشى، بەرەكەنىڭ ۇيتقىسى. حالقىمىزدىڭ بەيزاتتىق مۇراسى ورىمشىلىك ونەرىنىڭ دە كورنەكتى جالعاستىرۋشىسى. مىكەڭ ءبىلىم تولىقتىرعان كۋرسانت كەزىندە شينجياڭ وقۋ-اعارتۋ شۋەيۋانى جاعىنان 4 رەت «ىلعارى كۋرسانت» بولىپ سيلانسا، 1999−2006-جىلدار 8 جىل اۋىل دارەجەلى «ىلعارى قىزمەتكەر» بولىپ سيلانعان. باسقارعان مەكتەبى 8 جىل اۋىل جانە اۋدان دارەجەلى «ۇزدىك مەكتەپ» بولىپ باعالانعان. 1993−2004-جىلدار ىلگەرىندى– كەيىندى ءۇش رەت «ۇزدىكسز ءۇش جىل» ۇزدىك بولعاندارعا قوسىلاتىن ءبىر دارەجە ەڭبەك ءوسىرۋ سيلىعىنان يگىلىكتەنگەن. 2000-جىلى 9-ايدا قابا اۋدانى مەن التاي ايماعى جاعىنان «ىلعارى قىزمەتكەر»، 2002جىلى 5-ايدا التاي ايماعى جاعىنان «ىلعارى عىلىم–تەحنيكا جالپىلاسىترۋشى»، 2004-جىل 3-ايدا اۆتونوم رايوندىق وقۋ-اعارتۋ نازاراتى جاعىنان«ۇنەمشىلدىكپەن مەكتەپ باسقارۋداعى ىلعارى جەكە» بولىپ سيلانعان. سونداي–اق، التاي ايماعىنىڭ ىلعارى مەكتەپ باسشىلارىن ەكىسكورتسيالاتىپ كوز اياسىن كەڭەيتۋ ۇيىرمەسىنە قاتىناسىپ سينگاپۋر، مالايزيا، تايلاند قاتارلى 3 مەملەكەت پەن ەلىمىزدىڭ شياڭگاڭ، اۋمىن، شىنجىن، جۋحاي قاتارلى دامىعان رايون، قالالارىن ەكسكورتسيالاپ تاجىريبە قابىلداۋ، زەرتتەپ-ۇيرەنۋ ساپارىندا بولعان.