_ ءيا، قىزمەت ۋاقىتى بولىپ قالدى عوي، ونىڭ ۇستىنە تۇستەن كەيىن تاعى دا جيىن بار دەگەن، _ دەدى ەسىكتىڭ تۇتقاسىنا قول سوزا بەرگەن وڭعاربەك ناراۋ ءتىل قاتىپ، _ جيىننان كەشىگىپ قالسام، بەكەر ايلىقتان تارتادى.

    _ كەشكە ءبىر جاققا سىپ ەتە تۇسپەي، ەرتەرەك كەل، _ دەدى ورتا بويلى، نازىك دەنەلى، ۇزىنداۋ شاشىن جەلكەسىنەن جاۋىرىنىنا قاراي توگىپ جىبەرگەن راۋشان كۇيەۋىنە ەسكەرتۋ جاساپ.

    _ وي، قايدا بارادى عوي دەيسىڭ؟ _ دەدى پالتوسىنىڭ سوڭعى تۇيمەسىن تۇيمەلەپ جاتقان وڭعاربەك جىمىڭ ەتە ءتۇسىپ، _ نەمەنە، كەشكە جاقىن جۇمىس بارما ەدى؟

    _ ءۇي، ۇمىتىپ قالدىڭ با؟ بۇگىن كەشكە جاقىن تويعا بارامىز ەمەس پە؟ _ دەدى راۋشان سونى دا ۇمىتىپ قالدىڭ با دەگەندەي بۇرتيا قاراپ.

    _ ويبوي، بۇگىن تاعى دا توي بارما ەدى؟ _ دەدى ەسىك تۇتقاسىنا سوزا بەرگەن قولىن قايتا تارتىپ الا قويعان وڭعاربەك الدە نەدەن قاتتى قاجىعان ىڭعاي ءبىلدىرىپ، _ بۇگىنگى تويعا بارماي- اق قويساق بولماي ما؟

    _ نەگە؟ _ دەپ سۇرادى اققۇباشالاۋ كەلگەن جۇقا وڭىنە نارازىلىق بەلگىسى ويناپ شىعا كەلگەن راۋشان.

    _ ويتكەنى ەرتەڭ جاڭا ساباعىم بار ەدى، _ دەپ تۇسىنىك جاسادى وڭعاربەك، _ بۇگىن تۇستەن كەيىن جيىن اشىلاتىن بولسا، كەشكە دايىندىق كورمەسەم بولمايدى.

    _ وي، ول ساباعىڭدى قويا تۇر، بۇگىنگى تويعا بارماساق بولمايدى، _ دەدى راۋشان جۇپ- جۇقا ەرنى سىپ- سىپ ەتىپ، _ سەبەبى ولار بىلتىرعى جىلى دانانىڭ سىرعا تويىنا كەلگەن بولاتىن. ەندى سول قارىزدى قايتارامىز.

    _ ويبوي، ونىسى تاعى بارما ەدى؟ _ دەدى ەسىك تۇتقاسىنا سوزا بەرگەن قولى كەڭىستىكتە تۇرىپ قالعان وڭعاربەك، _ وندا نەدە بولسا تاۋەكەل، بارايىق.

    _ ءۇي، ساعان بۇگىن بىردەمە جەتكەن بە؟ اسىعىپ قايدا باراسىڭ؟ _ دەدى جاسىل ءتۇستى ادەمى يوپكاسىنىڭ ەتەگىن ءتۇسىرىپ جاتىپ راۋشان، _ وندا قالاي بارامىز؟

    _ قالاي بارعانى نەسى؟ سونى دا مەنەن سۇرايسىڭ با؟ _ دەدى الدە نەگە تىجىرىنا قالعان وڭعاربەك ابدەن مەزى بولعانداي بولىپ، _ تويلىققا ەل سەكىلدى 50 يۋان اپارا سالساڭ بولدى عوي.

    _ پو، وندا قايتىپ بولادى؟ _ دەدى جۇپ- جۇقا ەرنىن بۇرتيتا قالعان راۋشان، _ ەرلاننىڭ ايەلى مەنىڭ قىزمەتتەسىم ەمەس پە؟ ەرتەڭ ءبىزدىڭ تويىمىزعا ارەڭ 50 يۋان عانا اكەلىپتى دەپ ءسوز قىلادى. ونىڭ ۇستىنە بىلتىر دانانىڭ سىرعا تويىنا دا وزدەرى 100 يۋان قوسقان بولاتىن.

    _ وندا قايتەمىز؟ _ دەدى اسىعىپ تۇرعان وڭعاربەك ساعاتىنا قاراپ قويىپ.

    _ كەم دەگەندە 150 يۋان اپارايىق.

    _ بولادى، _ دەدى ەسىكتىڭ قۇلىبىن بۇراي بەرگەن وڭعاربەك، _ اپارساڭ اپارا بەر.

    _ وي، قايدا باراسىڭ؟ اسىقپاي بىتتەي تۇرا تۇرشى، _ دەدى راۋشان اياعىنا سۇيرەتپە شاقاي كيىپ جاتىپ، _ وندا اقشانى قايدان الامىز؟

    _ قايدان العانى نەسى، وزىڭدەگى اقشالار ءبىتىپ كەتتى مە؟ _ دەدى وسى ساتتە ەسىك كوزىندە ارى قاراعان بەتى اڭتارىلا تۇرىپ قالعان وڭعاربەك.

    _ ول اقشادان 50 يۋانداي عانا قالدى عوي دەيمىن، _ دەدى راۋشان وڭعاربەككە ەركەلەي قاراپ، _ بولماسا سەنىڭ الگى اقشاڭنان الا تۇرساق قايتەدى؟

    _ مەندەگى قايداعى اقشا؟

    _ سەنىڭ الگى كومپيۋتەر الامىن دەپ جيناپ جۇرگەن اقشاڭشى؟

    _ ويبوي، وعان تاعى اۋىز سالايىن دەدىڭ بە؟ _ دەدى كەيىستى ۇنمەن ءتىل قاتقان وڭعاربەك قايتادان بەرى بۇرىلىپ، _ ءبىر كومپيۋتەر الامىن با دەپ ءبىر جىلدان بەرى ارەڭ 1000 يۋان اقشا قۇراعان ەدىم، ونىڭ ءبارى تويعا كەتەتىن بولدى عوي!

    _ ءۇي، ءبۇيتىپ قينالماشى؟ جان ءتىرى بولسا اقشا دەگەن تابىلادى، _ دەپ وڭعاربەكتىڭ كوڭىلىن اۋلادى راۋشان، _ ايلىق الاتىن ۋاقىت تا تاياپ قالدى عوي.

    _ ءبۇيتىپ ءبىر ايدا ون نەشە رەت تويعا بارعاندا، _ دەدى الدەبىر كەكەسىنمەن مىرس ەتە تۇسكەن وڭعاربەك، _ مەن ءومىر بويى كومپيۋتەر الا الماسپىن!

    _ ول اقشالاردا بەكەرگە كەتىپ جاتقان جوق، تويعا، قۋانىشقا جۇمسالىپ جاتىر، _ دەدى كۇيەۋىنىڭ وكپەلى وڭىنە قاراپ قويعان راۋشان، _ « توي دەگەندە قۋباس دومالايدى» دەگەن ەمەس پە.

    _ وي، ءويتىپ قۋباس دومالاعانى قۇرىسىن! توي، توي دەپ راسىندا اقشادان قۋباس بولىپ قالاتىن بولدىق، _ دەگەن وڭعاربەك كىمگە رەنجىگەنى بەلگىسىز، ەسىكتى سەرپە اشىپ قالدى دا، سىرتقا ادىمداپ شىعا جونەلدى.