بەيسەنباي دالەلعازى ۇلى
اۋىلىم - ساعىنىشىم
تاۋعا تاعزىم
قاراتاۋىم قاسيەت بار وزىڭدە،
بابالارىم مەكەن ەتكەن كەزىندە.
قاي قاشاندا جىگەر بەرىپ ساناعا،
شالقىتاسىڭ شابىت سيلاپ سەزىمگە.
قانىپ ءىشىپ بۇلاعىڭنىڭ تۇنىعىن،
قۇشاعىڭدا جەلكىلدەگەن تۇلىمىم.
« قارا» دەسە ءباز بىرەۋلەر نەسى شام،
قوي قايىرعان قاراتاۋدىڭ ۇلىمىن.
قاراتاۋىم مالعا جايلى ءورىسىڭ،
ەركەلەتكەن اڭ مەن قۇستىڭ سەرىسىن.
قارا قوسىم حان سارايدان ارتىق دەپ،
سەنەن تاپقان اتا-بابام قونىسىن.
قاراتاۋىم قاسيەتىڭە باس ۇردىم،
قاينارىسىڭ تاۋسىلمايتىن اسىلدىڭ.
قارت ابىزداي قارسى الدىمدا تۇراسىڭ،
سىرىن شەرتىپ سان مىڭداعان عاسىردىڭ.
قارا اتانىڭ قاراتاۋدى كوكسەگەن،
قازاق سالتى بىرگە كوشكەن كوشپەنەن.
قاراتاۋعا مىناجات قىلىپ وتەمىن،
بابامىزدىڭ تابان ءمورى وشپەگەن.
جايلاۋىم
ساعىندىم جايلاۋىمدى،
تۇپ- تۇنىق اۋاسى بال.
ساعىندىم قويلى اۋىلدى،
تاۋى پاڭ، دالاسى سال.
قۇلپىرىپ گۇلگە تولىپ،
كەڭ ءتوسى جايلاۋىمنىڭ.
باسىنا باقىت قونىپ،
شالقيتن قويلى اۋىلىم.
سىڭعىرلى بۇلاعىڭدى،
بۇلبۇلمەن تەڭ كورەمىن.
ساعىنىپ قۇراعىڭدى،
اتا جۇرت مەن كەلەمىن.
ءوزىڭسىڭ جەر ۇيىعى،
جايلاۋىم كەڭ مەكەنىم.
بەيىشپەن تەڭ ىيىعى،
جىرىممەن تەربەتەمىن.
كورشى قىز
ساعىنىشتان ءوزىڭ كۇي بوپ شەرتىلدىڭ،
ءبارىن جاۋلاپ العاندايسىڭ ەركىمنىڭ.
تىلەگىمىز شىعۋشى ەدى ءبىر جەردەن،
بەسىگىندە تەربەلگەنمەن ەكى ۇيدىڭ.
بىرگە ءوسىپ بالا شاقتان ەكەۋمىز،
دەۋشى ەدىك ءبىر ارمانعا جەتەرمىز.
تاڭنان ەرتە اتتاندىرىپ مەكتەپكە،
سوڭىمىزدان كوز سالاتىن شەشەمىز.
جۇرۋشى ەدىك اۋىل كەشىن سايرانداپ،
بەرەكەمەن ءبولىسىپ جەپ بال قايماق.
سەن السقا كەتكەن شاقتا كورشى قىز،
مەن قالىپ ەم ءبىر ءوزىڭدى ارمانداپ.
و، بالالىق كەتتىڭ بىزدەن الىستاپ،
ءالى ەسىمدە تانىس اۋىل، تانىس باق.
سەن جۇرەسىڭ تۇسىمدە ءالى كورشى قىز،
اتىڭدى اتاپ، ايعايلايمىن داۋىستاپ.
اۆتوردىڭ مەكەن ءجايى: قابا اۋدانى كۇلباي اۋىلدىق قاراشىلىك قىستاعى
加载评论内容,请稍等......