باس بەت   »ادەبيەت ايدىنى»  جىر بۇلاعى»   ءومىر – تەڭىز
ءومىر – تەڭىز
التايقان سادىق ۇلى

ءومىر – تەڭىز

قۇم تەڭىز


كوك تەڭىزدەي الاساتىپ تۋلاماي،
سبىر-سبىر ەستىلەدى قۇم تەڭىزدەن ءۇن تالاي؟
مەڭىرەۋ مەزگىل، سولعىن تارتىپ تۋعان اي،
جىلت-جىلت ەتكەن جىلعالاردان تابىلادى ءىز قالاي؟

سابىر- سابىر سىرشىل جۇرەك،
ساباڭا ءتۇس سىزداماي.
قۇبا تۇزدە قۇلان جۇزگەن،
ءاپپاق ايدىن قۇم- تەڭىز.
قۇم تەڭىزدە قۇلازيدى،
ەرتەكتەگى كۇنكە قىز.
قۇم تولقىندار بۇيرات- بۇيرات
بۇلقسىعان بۇلا مۇڭ،

بۇعىپ جاتقان بۇل اۋماقتا
قۇپيالى سىر تەڭىز،
ۇڭىلەرسىڭ وسى سىردىڭ
قاسيەتىن بىلسەڭىز.


جىل - كەرۋەن


جىرتىلعاندا كالەندىردىڭ كادۋەلگى پاراعى،
جىل كەرۋەنى كۇمىس قوڭىراۋ كۇمبىر-كۇمبىر قاعادى.
كۇمىس ءۇنى تازا، ءتاتتى باعالى،
بۇل تىرلىككە ءۇمىت وتىن جاعادى.

جىل كەرۋەنى بۇگىنگىگە بايلاپ ارمان بۇيداسىن،
تولقىتادى توعاناعى وي مەن سەزىم تۇلعاسىن.
كەشەگىدەن ءىز قالدى ما، اسقان اسۋ، جىلعاسىن،
ءبىر اقتارشى اعايىن، دوس-قۇرداسىم.

جىل كەرۋەنى باسقان جولدىڭ، توككەن تەردىڭ كۋاسى،
ءوزىڭدى دوس ەكىلەنبەي ساراپقا سال، سىناشى.
وشپەس ءىزىڭ، توككەن تەرىڭ بولسا ەگەر تۋراسى،
توعاناقتى جىل كەرۋەنىن ەمىرەنە جىرلاشى.

جىل كەرۋەنى كۇمىس قوڭىراۋ قاعادى،
ءومىر- وزەن ايمالايدى جاعانى.
باسقان جولىڭ شالىس ەمەس بولسا ەگەر باعالى،
حالىق قازى، زامان بەرەر باعانى.

وكىنبەسسىڭ سوندا بۇگىن، اعايىن،
سىر توگەدى ءاپپاق كۇمىس سامايىڭ.
ادال تەرمەن وتكەن بولسا سان ايىڭ،
كۇلتەلەنگەن ءدال قازىرگى ماڭايىڭ.
بۇلجىمايتىن ناق اقيقات بۇگىنىڭ،
يىعىڭدا سالماعى بار ءومىر ارتقان جۇگىنىڭ،
تارازىشىل ءداۋىر مىناۋ، كىنامشىل كوز ءمىنى مىڭ،
بەكەم بولسىن ادال، ارلى ازاماتتىق تۇعىرىڭ.

جىل كەرۋەنى قاعىپ جاتىر قوڭىراۋ،
بۇگىنىڭنەن كەلەشەگىڭ سونىلاۋ.
شىن وردەنگە تولسىن دەسەڭ ومىراۋ،
پەندەلىكتىڭ قۇرا بلگەن جولىنا اۋ.
ءومىر سولاي كەشە، بۇگىن، ەرتەڭنەن،
تارتا المايسىڭ كەرۋەنىن جەلكەڭمەن.
ساقتانا الساڭ “مەن- مەندىكتەن”، “سەلتەڭىنەن”،
ازاماتتىق ءىزىڭ وشپەس ەل سەنگەن.

ادالدىعىڭ، اقىل، ارىڭ، وركەنىڭ،
ەرتەڭىڭە نەگىز بولار مول سەنىم،
“داۋرەن ءوتتى” دەگەن مۇڭىڭ ەركە مۇڭ،
ءومىر- تەڭىز جىعىلماسىن جەلكەنىڭ.


ەسكى جۇرت


سوناۋ ءبىر تاۋدا باۋىرىم،
بابامنىڭ سارى جۇرتى بار.
داراسىندا سول تاۋدىڭ،
كىسىنەيدى جىلقىلار.

سوندا تۋعام مەن داعى،
سونىسىنا اۋناعام.
كيەسى بار جونداعى،
سول قونىسى ءان ماعان.

ساي تاعانى سازداۋىت،
جوتا، جونى ءاپپاق قار.
اق سوڭكەسى مازداۋىق،
كوك ءتۇتىنى اسقاقتار.

ءتورت تۇلىگى توگىلگەن،
تولشەڭدىگى مارجانداي.
اۋىل ءۇيدىڭ بىرلىگى،
كەيىنگىگە ارمانداي.
سارى قىمىزى سابادا،
كەڭسىرىگىڭ اشيتىن.
ايران، ءسۇتىن قالاعا،
اكەم ىلعي تاسيتىن.

سابا ءپسىپ انامىز،
قارىندايتىن سارمايدى.
بىرگە وينايتىن بالا قىز،
ساعىنىشتان سارعايدى.

اق بۇرشاق پەن بوراندا،
كيەسى مول كيىز ءۇي.
بىلق ەتپەيتىن وعان دا،
سوندا ەسەيدىك ءبىز ىلعي.

جانعا جايلى سامالى،
سوناۋ تاۋدا سول جۇرتتىڭ،
ەتەك، جەڭدى، جاعانى
تۇزەتتىردى بولمىسىڭ.

(بۋرىلتوعاي اۋدانى وقۋ-اعارتۋ مەكەمەسى)
رەد: قايرات بايدوللا ۇلى


«التاي اياسى» جۋرنالىنا جازىلىڭىز، شىعارما جولداڭىز! «التاي اياسى» جۋرنالىنىڭ شىعارما قابىلداۋ ەلەكتروندى حات ساندىق ءادرسى: altayayase@qq.com


ەسكەرتۋ: جازبا «التاي اياسى» جۋرنالى رەداكسياسىنىڭ رۇقساتىمەن جاس قانات تورابىنا شىعارىلىپ وتىر. جاسامپازدىق تۋىندىلارىڭ بارلىق باسپا ۇقىعى قورعالادى ،كەلىسىمنەن وتپەگەندە كوشىرىپ پايدالانۋعا بولمايدى.


سوڭعى قوسىلعان جازبالار

قاتىستى باعالار

  加载评论内容,请稍等......