ءتۇن جارىمىنداعى توپلي تىقىرى

ءتۇن ورتاسىندا قورقىنىشتى تۇستەن  قارا تەرگە مالشىنىپ ويانعان چىن بوچيڭ ،تۇسىندە جىلان شاعىپ قان جوسا بولىپ جاتىر ەكەن.ول ورنىنان تۇرىپ،ۇيقى كيىمىن شەشتى دە تازالىق بولمەسىنە كىرىپ جۋىنا باستادى.

ءدال وسى كەزدە ءۇي سىرتىنان عاجايىپ دىبىس ەستىلدى.

چىن بوچيڭنىڭ جاتىن بولمەسى بۇل عيماراتتىڭ ءتورتىنشى قاباتىنىڭ باسپالداققا جاقىن ءبىرىنشى ەسىگى بولاتىن،ءدال وسىنداي ءتۇن تىنىشتىعىندا شىعاتىن" تاق –تۇق،تاق-تۇق" ەتكەن ەرەكشە دىبىس وتە انىق،ريتىمدى،بەينە بيىك وكشە توپىلي كيگەن ادامنىڭ تىقىلداتا اقىرىن باسىپ جۇرىپ كەلە جاتقانى سەكىلدى،چىن بوچيڭنىڭ قۇلاعىنا انىق ەستىلدى.

چىن بوچيڭ ورامالعا ورانا سالىپ ەسىكتى سەرپە اشىپ اتىلىپ شىقتى،اياق دىبىسى تىنا قالدى،جىم-جىرت ەش دىبىس جوق.

چىن بوچيڭنىڭ ۇيقىسى كەلمەدى،ميىنان تەك :ءتۇن ورتاسىندا جۇرىپ جۇرگەن كىم؟ دەگەن سۇراق شىقپادى.ازىناعان بوران داۋىسى بەينە ايەلدىڭ جىلاعان داۋىسى سەكىلدى سىڭسيدى.قاتتى تىتىركەنگەن چىن بوچيڭ تەرەزەنى جاۋىپ قويسادا،ۇيىقتاي المادى.

سودان باستاپ،بۇل داۋىس ءار كۇنى كەش مەزگىلسىز ۋاقىتتا تىقىلداي شىعىپ،بەينە جىن جۇرگەندەي ەلەستەپ،چىن بوچيڭنىڭ مازاسىن الدى،ول باتىرلىقپەن باسپالداققا جاقىنداسا بولدى بۇل اياق دىبىس سىلتىدەي تىنادى.

چىن بوچيڭ ءار كۇنى ۇرەيلى ءتۇس كورۋمەن بولدى.

ءبىر كۇنى ەرتەمەن سەرىكتىك الدىنا ءبىر ساقشى ماشيناسى توقتادى.

حاتشى جىنجىن بىقتىرىلعان كوفەنى كوتەرىپ:" چىن مەڭگەرۋشى،لين بويجەتكەننىڭ جوعالعانىنا ءبىر اپتا بولدى، ساقشىلار جاڭا سەرىكتىككە تەكسەرۋ جۇرگىزدى،قازىر سىزدەن جاعداي ۇعىسپاقشى "دەدى كوفەنى قويىپ جاتىپ.

"شىركىن ول،قانداي ىسكەر بويجەتكەن ەدى،زادى نە ءىس بولعانىن بىلە المادىم. ساقشىلار كىرسىن دەدى" چىن بوچيڭ تەرەڭ كۇرسىنىپ.

قىلمىستى ىستەر ساقشىسى جۋ شياۋساي بۇل دەلونى تەكسەرگەندە ءبىرىنشى رەت كۇمان ارتقان ادامى سەرىكتىك مەڭگەرۋشىسى چىن بوچيڭ بولاتىن. سۇلۋ ايەل حاتشى مەن،سەرىكتىكتىڭ سەرى مەڭگەرۋشىسى قانداي ادامعادا بولسادا كۇمان تۋدىرارى قاق.

ايەل حاتشىسىنىڭ جوعالعانىنا قاتتى قايعىرىپ،بار پيىلىمەن ساقشىلارمەن سەلبەسىپ، دەلو انىقتاۋعا رازى بولىپ وتىرعان  جابىرقاڭقى بەينەدەگى، اڭقىلداق مەڭگەرۋشى چىن بوچيڭنىڭ جۋ شياۋسايعا قالدىرعان ءبىرىنشى ءتاسىرى وتە جاقسى بولادى.سىرتتاي قاراعاندا چىن بوچيڭدا ەشقانداي ماسەلە جوقتاي سەزىلەدى،ءبىراق تەكسەرۋ بارىسىندا جۋ شياۋساي مەڭگەرۋشى مەن لين جىڭياننىڭ قالىپسىز بايلانىسىنىڭ بار ەكەنىن سەزدى.جوعالار الدىندا ەش قانداي كوڭىل كۇي تولقۋى بولماعان،ءارى ەشقانداي تۋىس-قيىسى جوق لين جىڭياننىڭ، جوعالۋ ءجىپ ۇشىن قالىپسىز بايلانىستاعى چىن بوچيڭنىڭ بىلمەي قالۋى مۇمكىن ەمەس.

چىن بوچيڭ الدىندا وتىرعان بۇل جاس ساقشىنىڭ وزىنەن كۇماندانىپ وتىرعانىن بىلدى.لين جىڭيان مەن بولعان بايلانىسىن ەشكىم بىلمەيدى دەپ ويلاۋدا تىم جاداعايلىق ءجايىت سياقتى. "ول جوعالۋدان ءبىر كۇن بۇرىن ونى كورگەم،ول ۇستەمە جۇمىسىن اياقتاتىپ مەنىمەن بىرگە سەرىكتىكتەن ۇزاپ بارىپ،ءبىر تاكسيگە وتىرعان،ال مەن اۆتوكولىگىمدى ايداپ ۇيگە قايتتىم" دەدى  چىن بوچيڭ ءاربىر ءسوزىن ابايلاي سويلەپ.

جۋ شياۋساي سەرىكتىك كۇزەتشىسىنىڭ، لين جىڭياننىڭ تاكسيگە وتىرىپ ،چىن بوچيڭنىڭ اۆتوكولىگىن ايداپ اتتانعانىن ءوز كوزىمەن كوردىم دەگەن ءسوزىن ويلاپ،ونىڭ ءسوزىنىڭ شىندىق ەكەنىن مويىنداپ باسىن يزەدى.

ول جانە بىردەمەلەردى سۇراپ ەدى،چىن بوچيڭ ەش مۇلتىكسىز جاۋاپ قايىردى.

-2-

توسەككە شىققان چىن بوچيڭ، ساقشىنىڭ كۇماندى كوزقاراسى مەن باجايلاي قاراعان بەينەسىن ويلاعاندا قاتتى جايسىزدانىپ،مۇلدە ۇيقىسى كەلمەدى.ول ءاسىلى وتىرىك ايتقان،نوسەرلى جاڭبىر كۇنى،ءدال سول لين جىڭيان جوعالعان كۇنى،لين جىڭيان قىزمەتتەن تۇسكەن سوڭ ءمالىم ءبىر جەردەن تاكسيدەن تۇسىپ،چىن بوچيڭنىڭ كولىگىنە شىعىپ،ونىڭ سارايىنا كەلگەن.لين جىڭيان چىن بوچيڭنىڭ كوڭىلدەسى،چىن بوچيڭ ونى قازىرشە جارىققا شىعارۋ ويى جوق،سوندىقتان لين جىڭياننىڭ ارەكەتى قاراماققا كۇماندى سەزىلەدى.ءبىراق چىن بوچيڭ لين جىڭياندى قۇشاقتاپ سارايعا كىرگەن سوڭ،لين جىڭياننان قالىپسىز جاعداي بايقالماعان.تەك ول جۋىنۋعا كەتكەن مەزەتتە چىن بوچيڭ ءسال مىزعاپ كەتكەن،ويانعاندا لين جىڭيان جوق بوپ شىققان.ءتىپتى ەشقانداي بەلگى قالماعان،لين جىڭيان وسىلايشا چىن بوچيڭنىڭ سارايىنان سىرلى تۇردە جوعالعان.

دەگەنمەن كۇز مەزگىلى عوي،تەرەزە سىرتىندا بوران ازىنايدى،چىن بوچيڭ ارتقى اۋلاداعى شىنار اعاشىنىڭ جاپىراقتارىدا جاپىرلاي تۇسىپ جاتقان بولار دەپ ويلاي بەرگەنشە،"تىق-تىق" "تىق-تىق" ەتكەن داۋىس تاعى جاڭعىردى.بەينە مىڭ بۇرالعان ءبىر بويجەتكەننىڭ بۇرالا باسىپ قاباتتان تۇسىپ،قۇشاعىنا قۇلاعالى كەلە جاتقان ءتارىزدى.

چىن بوچيڭنىڭ بۇتىن دەنەسى تىتىرەپ كەتتى،قانشا دەگەنمەن جالىندى جاس قوي،ەسىكتى جۇلقا اشىپ اتىلىپ شىقتى،توپليدىڭ داۋىسى دا تىنا قالدى،ساراي ءىشى تىم- تىرىس،دالانىڭ الاسۇرعان بورانى ءتىپتى كۇشەيگەندەي سەزىلەدى.

"كىم؟ شىق بەرى!" دەدى چىن بوچيڭ ارىستانداي اقىرىپ،ەشقانداي دىبىس شىقپادى.توپليلى ايەل بەينە ءبىر قاراڭعى بۇرىشقا جاسىرىنىپ الىپ، ونىڭ قورقاقتىعىن ماسقارالاپ تۇرعانداي،ونى قاتتى ۇرەيلەندىردى.

"لين جىڭيان سەن ەكەنىڭدى ءبىلىپ تۇرمىن،ەلەسىڭمەن قورقىتپاقسىڭبا" دەپ ايعايلاعاندا تاعىدا ازىناعان بوران داۋىسىنان باسقا ەشتەمە شىقپادى.

ماشيناعا سۇيەنىپ تۇرعان جۋ شياۋساي تەمەكى تۇقىلىن لاقتىرىپ قالدى،امال قانشا چىن بوچيڭنىڭ سارايىن تىنتكەنگە ەشقانداي دالەل-سپات جوق.ءبىراق....،ول اسپانعا قارادى،اي قورالانىپ تۇر،ىزىڭداعان بوراننان باسقا ەشتەمە سىبىس جوق،ساراي بەينە قاراڭعىدا جۇرەسىنەن جاتقان دالا اڭى سپەتتى سۇركەيلى تۇنەرەدى.

ول ماشينا ەسىگىن سەرپە اشىپ كىرە بەرمەكشى بولعاندا،سارايدان دالا اڭىنىڭ ۇلىعان ۇنىندەي، وزانداعان سولعىن داۋىس شىقتى،وتە سۇركەيلى.ول تاني قويدى ،چىن بوچيڭنىڭ داۋىسى،سالدەن سوڭ بۇل داۋىس قايتا وزانداعانداي بولدى،جۋ شياۋساي كىرۋگە وڭتايلانىپ ەدى،ساراي قايتا جىم-جىرتتىققا شومدى.

ەرتەڭىندە چىن بوچيڭنىڭ كوزى ىسىنىپ ،ۇيىقتاماعاندىعىن بىلدىرىپ تۇردى.لين جىڭيانداي مىقتى حاتشى جوعالعانمەن سەرىكتىك قىزمەتى اقساپ قالعان جوق،جاڭا تاعايىندالعان حاتشى چىن بوچيڭعا جاقسى سەلبەسە الماعانمەن،جوقتان جاقسى ەكەن،چىن بوچيڭ كوڭىلىن ورنىقتىرىپ قىزمەتكە كىرىسىپ كەتتى.

بۇل ارالىقتا شىرىلداعان تەلەفون ۇنىدە تىنىپ،مەڭگەرۋشى ءبولىمى تىنىشتىققا شومدى. ەسىك سىرتىنان كەنەتتەن "تىق-تىق" "تىق-تىق" ەتكەن توپلي داۋىسى ەستىلدى.چىن بوچيڭ بەينە توبەسىنەن جاي تۇسكەندەي،قولىنداعى قالامىن ۇستەل ۇستىنە  "تارس" ەتكىزىپ تاستاي سالدى.....

مەڭگەرشى ءبولىمىنىڭ ەسىگى قاتتى سەرپە اشىلعاندا،ەسىككە تاياعان جىن جىن قاتتى شوشىپ ،قولىنداعى ماتاريالدار جەرگە شاشىلىپ تۇستى،ەكى بەتى قىزارعان چىن بوچيڭ ونىڭ اياعىنداعى بيىك وكشە توپليعا مەلشيە قاراپ ءبىراز تۇردى دا "جاڭا ءبىر بەلگىلەمە قۇرىڭدار،بۇدان كەيىن سەرىكتىكتەگى ايەل قىزمەتشىلەردىڭ توپلي كيۋىنە رۇحسات جوق!" دەدى داۋىسى جارقىشاقتانا ەسىكتى سەرپە جاۋىپ،ايەل حاتشى مەلشيىپ تۇرىپ قالدى.

-3-

جۋ شيڭۋساي ءار كۇنى كەش سارايدىڭ سىرتىنداعى بەلگە شىعىپ چىن بوچيڭنىڭ "قۇپيالىعىن" تەكسەرۋگە كىرىستى.بۇل ساراي شەت جەرگە ورنالاسقان،اينالاسىندا ەشقانداي جان جوق،جۋ شياۋسايدا تەك اۆتوماتتى دۇرگى بولسا بولعانى،باسقالاردىڭ كورىپ قالۋىنان الاڭدامايدى.

ەڭبەك قاشاندا ەش كەتپەيدى عوي،چىن بوچيڭنىڭ داۋىسىن ءتۇن ورتاسىندا ەستىگەن كۇننىڭ ەرتەسى كەشقۇرىم،جەڭىل جۇقا شاپانعا ورانعان جۋ شياۋساي قاتتى توڭىپ قالشىلداپ تۇرعان،كەنەت سارايدىڭ ەسىگى اشىلدى،جۋ شياۋساي دەرەۋ دۇرگىسىن سالعان ەدى،ۇيقى كيىمىن كيىپ تەڭسەلە باسىپ ارتقى اۋلاعا كەتىپ بارا جاتقان چىن بوچيڭدى كوردى.

قىرىسقاندا سارايدىڭ ارتىنداعى ارتقى اۋلانى كورۋ مۇمكىن بولمادى،جۋ شياۋساي ءوزىنىڭ قاتەلىگىن بايقاپ،چىن بوچيڭنىڭ ارتقى اۋلادا نە ىستەپ جاتقانىن بىلۋگە ۇمىتتەنىپ،بەلدەن جۇگىرىپ تۇسىپ سارايدىڭ ارتقى اۋلاسىنا قاراي باردى.

جۋ شياۋساي ارتقى اۋلاعا ايلانىپ بارىپ بار كۇشىمەن تامعا تىرمىسا شىقتى، چىن بوچيڭ اۋلادا ءالى جۇر ەكەن،بەينە شىنار اعاشىنىڭ جاپىراعىن زەرتتەپ، يا بولماسا شىنار اعاشىنىڭ جالعىزدىعىنا قايعىرىپ وتىرعانداي ،شىنار اعاشىنا قاراپ ءموليىپ وتىر.جۋ شياۋساي اكاۋ ول ولەڭ جازىپ وتىرما دەيتىندەي اقىن ەمەس ساۋداگەر ەدى عوي، قالاي بولعانى دەپ قاتتى تاڭىرقادى.

بولماسا بۇل اعاشتىڭ تۇبىندە بىردەمە بولعانى ما؟ ساقشى دا بولاتىن سەزگىرلىك جۋشياۋسايدىڭ ويىنا مۇردەنى ەلەستەتتى.

چىن بوچيڭ تاڭەرتەڭ ويانعان سوڭ دامىلسىز تۇشكىرىپ ءوزىنىڭ تىماۋراتىپ قالعانىن سەزدى،ونىڭ ۇستىنە كىلەم مەن سۇيرەتپە شاقايىنا سارى بالشىقتار جابىسىپتى.بۇل زادى قانداي ءىس؟ ءبىراق ونىڭ ويى باسقاعا ءبولىنىپ كەتتى،ول جاڭادان قىزمەتكە قابىلدانعان ياڭ مي دەگەن قىزدى ەسىنە الدى،ونىڭ ۇلبىرەگەن جۇزى،توق بالتىرى،لين جىڭياننان اۋمايدى ەكەن،مۇمكىن ونى لين جىڭيانعا وقساعاندىقتان قابىلداعان بولار.چىن بوچيڭنىڭ ەزۋىنە كۇلكى ۇيىرىلدى.

جۋ شياۋساي چىن بوچيڭنىڭ ارتقى اۋلاعا بارىپ ءبىر تۇپ اعاشتىڭ تۇبىنە وتىرعانىن كورگەنىنە بولا، ءتىنتۋ كۋالىگىن الۋعا ءوتىنىش بەرۋىنە بولمايدى عوي،وعان قاجەتى تەك دالەل-سپات.ال چىن بوچيڭدا جۋ شياۋسايعا جەتەرلىك قولايلىقتار تۋدىردى.ەكىنشى كۇنى كەشقۇرىم جۋ شياۋساي سارايدىڭ ىرگەسىندە اڭدىپ تۇرعان،چىن بوچيڭ ۇيقى كيىمىن كيىپ تاعى ارتقى اۋلعا كىرىپ ،ايلانا باستادى،"جىڭيان قايداسىڭ!" دەيدى دامىلسىز كۇبىرلەپ.اقىرىندا سارايدىڭ ارتىنداعى تام تۇبىنە بارىپ،شىنار اعاشىنا قاراپ تاعى وتىردى.شىنار اعاشى قوجايىننىڭ قاراۋى مەن قۇبىلا قالعان جوق،كۇز مەزگىلى بولعاندىقتان جاپىراعىنان ايىرىلعان بۇتاقتار ارسيىپ-اربيىپ تىپتەن سۇركەيلى كورىنەدى.ءبىر مەزگىل ءوتىپ ،جۋ شياۋساي قاتتى توڭىپ تۇشكىرۋگە اينالعاندا، چىن بوچيڭ باسىن سالبىراتىپ كەلگەن جولىمەن سارايعا بەتتەدى.

قاتارىنان ءۇش كۇنگە دەيىن چىن بوچيڭ جىل قۇستارى سەكىلدى كەلگەن جولى مەن شىعىپ -كىرىپ تۇسىنىكسىز ىستەردى قايتالاي بەرگەن سوڭ جۋ شياۋساي ونىڭ ۇيقى سۇراپ جۇرگەنىن بىلدى،ءارى شىنار اعاشىنىڭ تۇبىندە ءسوزسىز چىن بوچيڭنىڭ ەسىنەن شىقپايتىنداي ءبىر نارسەنىڭ بارلىعىن،سوندىقتان ول ءار كۇنى تۇندە ۇيقى سۇراپ وسى اعاش تۇبىنە كەلەتىنىن تۇسپالدادى.

-4-

ادام ىزدەۋ قۇلاقتاندىرۋىن شىعارعانىمەن، لين جىڭياننىڭ جوعالۋ دەلوسىنان ەش قانداي دەرەك بايقالمادى،ءبىراق جۋشياۋساي لين جىڭياننىڭ الدە قاشان ولگەنىن،ءارى چىن بوچيڭ سارايىنىڭ ارتقى باقشاسىنداعى سول شىنار اعاشىنىڭ تۇبىنە كومىلگەندىگىنە سەنىم ارتتى.

چىن بوچيڭ قاتتى تىماۋراتىپ تۇرعانى مەن توتەنشە سەرگەك تۇردى.لين جىڭيانعا وقشايتىن جاڭا كەلگەن ياڭ ميدىڭ چىن بوچيڭعا دەگەن ەشقانداي ىنتىزارلىعى جوق بولاتىن.سولاي بولا تۇرسادا چىن بوچيڭ ونى بۇگىن سارايىنا ۇسىنىس ەتپەك.

ياڭ مي چىن بوچيڭنىڭ ۇسىنىسىن ەش قىمسىنباستان قابىلدادى،ول تازالىق بولىمىنە جۋىنۋعا كىرگەندە، چىن بوچيڭ تەمەكىسىن تارتىپ توسەكتە توسىپ جاتقان.

جۋىنۋ بولمەسىندەگى سۋدىڭ شارىلى باسىلىسىمەن سىرتتان تاعى "تىق-تىق"  ەتكەن اياق دىبىس ەستىلدى،بەينە توپليدىڭ  يەسى الىستان بۇرالا باسىپ،ەسىك الدىنا كەلىپ توقتاي قالعانداي. دەمىن ىشىنە تارتقان چىن بوچيڭ ەسىك تۇتقاسىنا الايا قارادى،"ايەل" بەينە ەسىكتەن كىرۋ ويى جوقتاي از توقتاپ تۇردى دا،"تىق-تىق" "تىق-تىق " ەتكىزىپ ۇزاپ كەتتى،ءتىپتى قاباتتان تۇسىپ،سارايدىڭ ءبىر بۇرىشىنا جاسىرىنىپ قالعانداي سەزىلدى.

ياڭ مي ورامالعا ورانىپ بۇلىقسي شىققاندا ،سۇيىكتىسى قيالىنداعىداي قۇشاعىن اشىپ قارسى المادى،قايتا ىزبارلى الپەتپەن تەمىر ايىرداي تەگەۋرىندى ساۋساعىن الا جۇگىرپ موينىنان شاپ بەردى دە:"كەتپە دەدىم عوي سالداقى" دەدى موينىنان  قىسا تۇسىپ.

سالدەن سوڭ ياڭ مي سىلىق ەتە تۇستى :"جىڭيان،كەتپەشى،كەتپەشى" دەدى چىن بوچيڭ باجىلداي.ول قولىن بوساتقان كەزدە ياڭ مي كوزى الارىپ،الدە قاشان جان ءتاسىلىم بولعان ەدى.

چىن بوچيڭ كەنەت ەسىن جيدى، جىڭيان شىنىمەن ولگەن،سول كۇنى ول ونى تاستاپ كەتپەكشى بولعاندا،ول ۇناماعان،الىسىپ جۇرگەندە ابايسىزدا ونى باسپالداقتان قۇلاتىپ جىبەرگەن،ول بەينە تاس-تالقانى شىققان قۋىرشاق بالاداي بۇتىن دەنەسى سىلقىلداپ بوس قالعان،بىلايشا ايتقاندا ومىرىنەن ايىرىلعان ادەمى قۋىرشاق بالاداي جانسىز قالعان .ەسىندە قالۋىنشا ول ونى ەسى شىعا قۇشاقتاپ سارايدان تۇسىرگەندە،باقشاداعى شىنار اعاشىنىڭ تۇبىنە كومىپ تاستاعان.

شىنار اعاشى! چىن بوچيڭنىڭ كوزى جارق ەتە تۇستى،بۇل ۇمىتىلىپ كەتكەن ەلەس،ونداي بولسا ول مۇلدە جوعالماعان،ءوز جانىندا .

جۋ شياۋساي بۇل كۇنى كەش باسقا قىزمەتپەن ابىگەر بولعاندىقتان چىن بوچيڭدى اڭدۋىن توقتاتتى.ەكىنشى كۇنى،چىن بوچيڭنىڭ حاتشىسى جۋ شايۋسايعا چىن بوچيڭنىڭ جوعالعانىنا ءبىر كۇن بولعانىن  تىلدەسكى ارقىلى قابارلادى. "ءبارى بىتتى"دەدى جۋ شياۋساي ايعايلاپ،چىن بوچيڭ قىلمىسىنان قورقىپ قاشىپ كەتكەن بولماسىن؟.

جۋ شياۋساي سارايعا كەلگەندە چىن بوچيڭ ارتقى باقشاداعى شىنار اعاشىنىڭ تۇبىندە ءبىر قۋراعان باس سۇيەكتى قۇشاقتاپ،" كەتپەشى جىڭيان كەتپەشى" دەپ دامىلسىز كۇبىرلەپ وتىر ەكەن.

سارايىندا تاعى ءبىر بۋىندىرىپ ولتىرىلگەن ايەل مۇردەسى جاتىر،ول ولە-ولگەنشە ءوزىنىڭ ايداي جۇزى مەن اق بالىقتاي سانىنىڭ ءوزىن قۇرتقان باس سەبەپكەر ەكەنىن بىلمەي كەتتى.

ەس اقىلىنان اداسقان چىن بوچيڭ ادام ولتىرگەن دالەل-سپاتى تولىق بولعاندىقتان نەربى اۋىرۋلار ەمحاناسىنا كىردى.

ءبىراق تاڭعالارلىق ءجايت ءبىر اپتانىڭ الدىندا جوعالعان ايەلدىڭ ، وسىنشالىق تەزدىكتە قۋراپ قالعان باس سۇيەككە ايلانۋى بولدى، جۋ شياۋساي قاتتى كۇمانداندى، زاڭ شيپاگەرىنىڭ تەكسەۋ ناتيجەسىدە ونىڭ كۇمانىن راستادى.ونداي بولسا بۇل قۋراعان باس سۇيەك لين جىڭيان ەمەس بولدى،وندا ول قايدا؟ قۋراعان باس سۇيەك كىمدىكى بولعانى.

5 كۇننەن كەيىن،لين جىڭيان جۋ شياۋسايدىڭ كوز الدىنان پايدا بولدى.مۇردە ەمەس،سۇلۋدا سىمباتتى ادەمى قىزدىڭ وبىرازى.

-5-

"دوستارىم مەنى ماتايعا جارىم ايلىق ساياقاتقا بىرگە شىعۋعا ۇسىنىس ەتكەن بولاتىن،كەتەرىمدە چىن مەڭگەرۋشىگە قاعاز جازىپ تاستاپ كەتكەم،ونىڭ بىلمەۋى مۇمكىن ەمەس؟" دەدى لين جىڭيان جۋ شياۋسايعا تاڭىرقاي قاراپ.

"وندا سەن چىن بوچيڭنىڭ سارايىنداعى قۋراعان باس سۇيەك كىمدىكى ەكەنىن بىلەسىڭبە؟"

لين جىڭيان باسىن سالبىراتىپ ءبىراز ويلاندى دا،كەنەتتەن باسىن كوتەرىپ:" ايەلى بولىپ جۇرمەسىن؟" دەدى ۇرەيلەنە ايعايلاپ.بۇل لين جىڭياننىڭ ابايسىزدا ەستىگەن اتى،چىن بوچيڭنىڭ ايىرىقشا جاسىرىن ۇستايتىن ەسىمى.

جۋ شياۋساي چىن بوچيڭنىڭ ارحيۆبىن الىپ شىققاندا،توي راسىمدەگى ايەلدىڭ لين جىڭياننان اۋمايتىندىعىن كوردى،شىن سىر اشىلدى.چىن بوچيڭ ايەلىنىڭ اجىراسۋ تالابىن قابىلدامايدى،ءارى اياۋلى جارىنىڭ وزىنەن ايىرىلۋ ازابىنا توزە المايدى،سونىمەن ءبىر جولعى تالاس-تارتىس ۇستىندە ابايسىزدا ايەلىن قاباتتان يتەرىپ جىبەرىپ،شىنار اعاشىنىڭ تۇبىنە كومەدى،سودان ايەلىنەن اۋمايتىن لين جىڭياندى كوڭىلدەس قىلۋعا تالدايدى.لين جىڭيان ساياحاتقا شىققاندا ەس اقىلى اداسقان چىن بوچيڭ لين جىڭياندى ءولتىرىپ اعاش تۇبىنە كومىپ تاستادىم دەپ ويلاپ،3-رەت زيانكەستىككە ۇشىراۋشى ياڭ ميدى تالدايدى.

چىن بوچيڭ اقىلىنان اداسقاندىقتان، ايەلىن ولتىرگەن ەلەستەردى ۇمىتادى،ءتۇن ورتاسىندا زالدان شىعاتىن توپلي داۋىسى ونىڭ اۋىرۋىن قايتا قوزدىرادى دا،ونى لين جىڭياننان كورەدى.

جۋ شياۋساي چىن بوچيڭنىڭ ۇنەمى ايتاتىن توپلي داۋىسىنىڭ نە ەكەنىن تۇسىنبەي،چىن بوچيڭنىڭ سارايىنا كىرەدى.ءتۇن ورتاسىندا شىنىندا بەينە توپليمەن ەدەندە جۇرىپ جۇرگەن سەكىلدى "تىق-تىق" "تىق-تىق" ەتكەن داۋىس ەستىلەدى.تاڭ اتقان سوڭ جۋ شياۋساي داۋىس شىققان جاققا قاراي جۇرىپ وتىرىپ،ءۇي توبەسىنە كەلەدى.لين جىڭيان جوعالعان كۇننىڭ ەرتەڭگى ءتۇن ورتاسىندا قاتتى جاڭبىر ارالاس بوران سوعىپ،بولىنگەن قۇرلىس ماتاريالىن ءۇي توبەسىنە ۇشىرىپ اكەلەدى،ءار رەت بوران سوققاندا ماتاريالدىڭ قاتتى بۇرىشى توبەنى ۇرعىلاپ،"تىق-تىق" "تىق-تىق" ەتكەن داۋىس شىعارادى ەكەن.