اتام قايدا دەيسىڭ بە ، قۇلىنىم - اۋ ...
نۇرلان ماپاي ۇلى
اتام قايدا دەيسىڭ بە ، قۇلىنىم - اۋ ،
ۋاقىتقا ۇتىلدىق ۇرى مىناۋ .
كەۋدەسىنە باس قويىپ ەركەلەۋشى ەڭ ،
ساعىندىرىپ وتىرعان قىلىعىڭ - اۋ !
نە دەپ جاۋاپ بەرەيىن ەندى ساعان ،
تەك ءۇنسىز وتىرۋعا كەلدى شامام .
اينالدىم سەنىڭ ءسابي جۇرەگىڭنەن ،
بولسا ەكەن دەپ تىلەگەن سول كىسى امان .
ءولىپ - قۇشىپ سۇيەتىن تەرلەپ سەنى ،
مۇجىق قۇرتىن تەك ساعان بەرمەپ پە ەدى ؟!
جۇمىسقا كەتتى دەسەم ناناسىڭ با ،
سەنىڭ اتاڭ قاجىرلى ەدى ، ەڭبەكشى ەدى .
ءار ءبىر باسقان ءىزىنىڭ جولاعى بار ،
اتاڭ سالعان ءومىردىڭ سورابى بار .
تۋىسشىلاپ كەتتى دەپ ايتقىم كەلدى ،
سەنىڭ اتاڭ جان ەدى قوناعۋار .
شۋاق تاپقىڭ بار بىلەم باقىت تاڭنان ،
كورگىڭ كەلدى اتاڭدى اسىققاننان .
كورشى ۇيىندە وتىر دەپ ايتار ەدىم ،
جۇگىرىپ بارىپ قايتارسىڭ جاسىپ قارعام .
ساعان جاۋاپ بەرە الماي بايلاندى ءتىل ،
ەتكىم كەلمەي مەن تۇرمىن ارماندى تۇل .
ات ءمىنىپ جولاۋشىلاپ كەتتى دەر ەم ،
ول جانۋار قورادا بايلاۋلى تۇر .
اتاڭ كەتتى ءبىر جەرگە شالعاي دەگەن ،
سەن تۇگىلى وتىرمىن ارماندا مەن .
اتاڭ ەندى جاسايدى جۇرەكتەردە ،
قويشى ، بالام قاشانعى الداي بەرەم .....
مەن قورقامىن ....
مەن قورقامىن كۇلكىم جالعان بولۋدان ،
مەن قورقامىن ۇيقىم دا ارمان بولۋدان .
ەندىگارى سوقپايتىنداي ماڭگىلىك ،
ساعاتىم دا ءتىلسىز قالعان بولۋدان .
مەن قورقامىن دوسىم جالعان بولۋدان ،
تىگىپ العان قوسىم دا ارمان بولۋدان .
سوسىن ايعا قاراپ تۇرىپ تىلەنەم ،
ايىرما دەپ وتىم لاۋلاپ جانۋدان .
قورقا بەرەم جانباي قالسا كەۋدەدە وت ،
بىرەۋلەر كەپ الداي ما دەپ پەندە بوپ .
قىرى گۇلدىڭ سولماسا ەكەن دەپ تۇرام ،
قۇسى ءجيى قونسا ەكەن دەپ كولگە كەپ .
قورقام قاتتى ۋادەشىلدەۋ پەندەدەن ،
ماحابباتتىڭ كيەسىن دە سەزبەگەن .
ەسسىزدەردىڭ ەزۋىندە ءسوز بولعان ،
ماحابباتتى اياپ كەتەم كەيدە مەن .
قارىنداسقا ناز
وزىڭمەن تانىسقاندا كەشە كۇن كەپ ،
ءماز بولدىم مۇراتىما جەتەمىن دەپ .
ءبىراق سەن اعام بولشى دەدىڭ ماعان ،
قالعىم جوق بۇل ومىردە بوتەنىڭ بوپ .
اناۋدا اعام دەيتىنسىڭ مىناۋدا اعام ،
مەنى دە اعا دەگەنگە تىم الدانام .
سەن اعا دەپ جۇرگەنگە ءماز بولسامدا ،
ءبىراق سەنى كورۋگە قۇمارلانام .
پالەن اعام دەيتىنسىڭ مىرزا كوڭىل ،
سىر جاتقانىن بىلمەپپىن مۇندا نەءبىر .
سەنىمەنەن شاتتانعان ءبىزدىڭ كوڭىل ،
گۇلىمەنەن جايناعان جىلعالى ءوڭىر .
قۋانام دەپ بىرەۋ كەپ باعىڭدى اشسا ،
باقىت كەپ ەسىگىڭدى قاعىپ جاتسا .
اعامىز دەپ كوپ جىگىت تىلەك ەتتىك ،
بارىمىزگە ورتاق ءبىر قارىنداسقا .
ءبىر كۇنى قارا جەردى تەپكىلەدىك ،
نەدەگەن اڭقاۋ ەدىك ەسسىز ەدىك .
مىرزا كوڭىل دەپ جۇرگەن اعاڭىزبەن ،
ءبىزدى الداپ ومىرلىككە كەتتىڭ ەرىپ .
تامساندىم تىم ادەمى گۇل ەدىڭ دەپ ،
ويلامادىم ءبىر اعاڭ ۇزەرىن كەپ .
اعالىقتان اسا الماي ءجۇرىپپىز - اۋ ،
قارىنداستىڭ قادىرىن بىلەمىن دەپ .
ءسۇيۋدىڭ قىمبات ەكەن نارقى بىلسەك ،
بىلە تۇرا ادەيى تارتىنۋشى ەك .
سەن سەكىلدى الدانىپ قۋ قىزدارعا ،
اعا بولىپ ءجۇر ەكەن قانشا ىنىشەك ؟!
加载评论内容,请稍等......