جارقىن ءالماقىن ۇلى 1966-جىلى 4–ايدىڭ 20-كۇنى قابا اۋدانى اقشي قالاشىعىندا تۋعان. 1974–جىلدان 1982-جىلعا دەيىن قابا اۋدانى سارتام اۋىلىندا باستاۋىش، ورتالاۋ وقىعان. 1983−1984-جىلدارى كاسىپ كۇتكەن، 1985-جىلى اسكەرگە قابىلدانىپ، 1987-جىلعا دەيىن شىڭگىل اۋدانىندا جانە تايكەشكەن شەكارا وتكەلىندە مىندەپ وتەپ، 1987-جىلى 3-ايدان 1989-جىلعا دەيىن سانجى اسكەري مەكتەپتەن وقىپ، 1989-جىلدان 1996-جىلعا دەيىن كوكتوعاي اۋدانى كۇرتى اۋىلدىق شەكارا قورعانىس بولىمشە اتىرەتىندە جاۋىنگەر، ورىنباسار اتىرەت باستىعى، ورىنباسار ساياسي جەتەكشى بولىپ، ورىنباسار يىڭ دارەجەلى شەن العان. 1997-جىلدان 2000-جىلعا دەيىن ىلە وبلىستىق پارتيا مەكتەبىنىڭ «مال شاراۋشىلىق باسقارۋ» كاسىبىنەن قىزمەت ىستەي ءجۇرىپ وقىپ، ارناۋلى كۋرس ماعلۇماتىنا يە بولعان. 2001–جىلدان 2003-جىلعا دەيىن اۆتونوم رايوندىق جوعارى دارەجەلى ساقشى وفيتسەرلەر مەكتەبىنەن ءبىلىم تولىقتاپ، 2004–جىلى كوكتوعاي اۋدانى كۇرتى شەكارا قورعانىس اتىرەتىنىڭ ساياسي جەتەكشىلىك مىندەتىنە كوتەرىلگەن. 2005-جىلى التاي ايماعىندا جانە اۆتونوم رايوندا تۇراتىن قارۋلى ساقشى باس اتىرەتىنىڭ 1-رەت اشىلعان ەكى دارەجەلى پارتيا قۇرىلتايىنىڭ ۋاكىلى بولعان. 2006-جىلى كوكتوعاي اۋداندىق شەكارا قورعانىس ۇلكەن اتىرەتىنىڭ ورىنباسار اترەت باستىعىنا ءوسىرىلىپ، يىڭ دارەجەلى اسكەري شەنگە العان. 2009-جىلى 2-ايدا داڭقپەن دەمالىسقا شققان. اسكەري ساپتا اۋىل، اۋدان، ايماق سىندى ءۇش دارەجە بويىنشا 11 رەت سيلانىپ، ەكى رەت 3–دارەجەلى ەڭبەك ءسڭىرۋ مەدالىمەن ماراپپاتتالقان. دەمالىسقا شىققاننان كەيىن كوكتوعاي اۋداندىق ساياسي كەڭەستىڭ 13-كەزەكتى جورالىق قىزمەت مىندەت وتەۋدە. جارقىننىڭ اكەسى ءالماقىن دۇيەدەن وتكەننەن كەيىن، جارقىن ءالماقىننىڭ بايبىشەسى جاقسىبالانىڭ ماپەلەۋىندە بولعان. اكەسى ءالماقىن مارقۇم ازاتتىقتان ىلگەرى 7−8 تۇتىننەن قۇرالعان جەتىم-جەسىر، جوق-جىتىك ءبىر اۋىل اتالاس تۋىستارعا قيىن كۇندەردە باس-كوز بولىپ، سۇيەنىش قورعاندىق رول ويناعان ەرەكشە مەيىرىمدى ادام بولىپ، تۋىس-تۋعانداردى قويىپ ءبۇتىن قاباداعى جادىك اۋىلدارى قادىر تۇتاتىن توتەنشە سيلى ادام بولعاندىقتان، جۇبايى مەن بالاسىن تۋىس-تۋعان ەل-جۇرت بولىپ قۇرمەتتەپ، جارقىن مەن شەشەسى جاقسىبالا ەكەۋى ءبىر سەميادا ەل قاتارى تۇرمىس كەشىرىپ جۇرگەندە، 1978-جىلى 5-ايدا شەشەسى جاقسىبالا اۋرۋدان قايتىس بولعاننان كەيىن، نەمەرەلەس اكەسى ءىبىراھيم (ىبىراي) كۇدەرباي ۇلى مولدانىڭ ۇيىمداستىرۋىنداعى تۋىستاردىڭ باس قوسۋ كەڭەسىندە، «جارقىن ءبىزدىڭ ۇيدە بولسىن» دەۋشى تۋىستار بىرنەشە ادام بولىپ، قاي تۋىستىڭ ۇيىنە بارۋدى ەڭ سوڭىندا جارقىننىڭ ءوز قالاۋى ءبىلسىن دەگەنگە كەلىسىپ، سوڭىندا جارقىنىڭ تالعامى بويىنشا نەمەرەلەس اعاسى باتان قابدوللا ۇلىنىڭ قولىنا بارادى. باتان بۇرىنعىنىڭ سارقىنى، كونە كوزدەردىڭ جالعاسى. كونە قوعام مەن جاڭا قوعامدى، جوقشىلىق پەن توقشىلىقتى بىردەي باستان كەشىرىپ بۇرىنعىلاردى كورە قالعان، اكەسىنىڭ ءىنىسى ءالماقىننىڭ تاربيەلەۋىندە ەرجەتىپ، ادامگەرشىلىك جاقسىلىعىنان يگىلىك كورگەن ادام بولىپ قالماستان، ايەلى ٵسىما ەكەۋى قۇپ جاراسقان تاتۋ-ءتاتتى جۇبايلار. تۋىس– تۋعانعا ەرەكشە قايىرىمدى، باۋىرمال، توتەنشە جاقسى ادامدار ەدى. جارقىندى ءوز بالالارىنداي ەرەكشە مەيىرىمدىلىكپەن باعىپ ەرجەتكىزىپ، اسكەري مىندەت وتەپ كەلۋگە جىبەرىپ، كەيىن سەميالانۋىنا كومەك كورسەتىپ شىنايى تۋىستىق، ءتىپتى، اكە-شەشەلىك بورىش وتەدى. جارقىندا باتان مەن ٵسىمانى تۋعان اكە–شەشەسىندەي بالالىق سۇيىسپەنشىلىكپەن جانىنداي جاقسى كورىپ، باتاننىڭ بالاسىمىن دەپ كەتتى، ءتىپتى، ازاماتتىق كۋالىگىنە دەيىن سولاي جازىپ ءجۇر. جالعاستى باتان بالالارىمەن ءبىر تۋىسقانداي قارىم–قاتىناستا بولىپ، باتان بالاسى بولا بەرمەك. مىنە بۇل، شىنايى تۋىستىق قاتىناسى، ۇرپاققا ۇلگى بولارلىق باعالى قاسيەت.