مۇقتار قايسا ۇلى 1927-جىلى قابا اۋانىنىڭ «اق قايىڭ» دەگەن جەرىندە مالشى وتباسىندا دۇنيەگە كەلگەن. 1937-جىلعا دەيىن اتا–انا تاربيەسىندە بولعان. 1937-جىلدان 1944-جىلعا دەيىن قابا اۋدانى اقشي قالاشىق «جانات» باستاۋىش مەكتەبىندە وقىعان، 1944-جىلدان 1950–جىلعا دەيىن اۋىلدا بولعان، 1950-جىلدان 1956-جىلعا دەيىن قابادا تۇڭعىش قۇرىلعان جاڭا دەموكراتيالىق وداقتىڭ حاتشسى بولعان. 1956-جىلدان باستاپ قابا اۋداندىق استىق مەكەمەسىندە قامباشى، استىق مانەرلەۋ زاۆوتىنىڭ باستىعى، استىق قامبا ءبولىمىنىڭ باستىعى، استىق مەكەمە پارتيا ياچەيكاسىنىڭ سەكراتارى قاتارلى قىزمەتتەردى بەلسەندلىكپەن ىستەپ، ءار جىلى «وزات قىزمەتكەر»، «ۇلگىلى پارتيا مۇشەسى» بولىپ سيلانىپ، استانامىز بەيجيڭ، ۇلكەن قالا شاڭحايعا ەگسكۋرتسياعا بارىپ، مەملەكەتتىڭ جوعارى دارەجەلى باسشىلارىنىڭ قابىلداۋىندا بولعان. 1989-جىلى داڭقپەن دەمالىسقا شىققان. مۇقاڭ جاسىندا وقۋدا زەرەك بولىپ، ەرتە ساۋاتىن اشىپ، اۋىل اقساقالدارىنا حاتشىلىق ىستەپ، قوعامدىق قىزمەتكە ەرتە ارالاسىپ، اشىق ويلى، باۋىرمال وبال-ساۋاپتى پارىقتايتىن جاپار قاتارلى بوقاي رۋىنىڭ كوزى اشىق، كوكىرەگى وياۋ، ەلىن اشارشىلىقتان اراشالاي بىلگەن ىسكەر اۋىل اعالارىنىڭ ەل باسقارۋ قاعيداسىنىڭ شەت جاعاسىن كورە قالعان. ەلدى بەرەكە–بىرلىككە باستاپ، جان باعۋعا جەتەلەۋدىڭ امال-قاعيدالارىن ۇعىنعان ادام. ەلىمىز العاش ازات بولا باستاعان جوقشىلىق داۋىردە قابا اۋداندىق استىق مەكەمەسىنىڭ استىق قامبالاۋ، نورمالاپ تاراتۋ سىندى سول ءداۋىردىڭ ەڭ ماڭىزدى قىزمەتىنىڭ ءبىر شەتىندە بولىپ، قىزمەتتە قان قىزبالىق بايقاتىپ حالىققا قاعاجۋ كورسەتكەن ەمەس، قايتا، «ىستىك تە، توستىك تە كۇيمەيتىن» دارەجەدە يكەمدى جۇمىس جۇرگىزىپ، ۇكىمەت تاراۋلارىنىڭ تالابىنان شىعا بىلۋىمەن بىرگە، اش–جالاڭاش حالىقتىڭ دا قينشىلىعىن شەشە بىلگەن. كوپتىڭ قالاۋىنان شىققان اقساقالدارىمىزدىڭ ءبىرى بولدى. ورنىن تاۋىپ سويلەيتىن، كوپىرمەشىلىگى جوق، وتىرىك ايتپايتىن، اڭگىمەشىل، مىسقىلشىل، زامانداستارى مەن بالدىزدارىنىڭ اۋىزىن اشتىرمايتىن سوزگە شەشەن، پسىق، ەتى ءتىرى، جۇمسقا ورامدى، ادامگەرشىلكتى ەڭ جوعارى قوياتىن ادام بولعان. ءومىرىنىڭ سوڭعى داۋىرىندە، سول ادال ەڭبەگىنىڭ جەمىستى ناتيجەسىندە وزىندىك بەدەل تىكتەگەن، پارتيا، ۇكىمەت تاراۋى ۇنەمى حال–جاي ۇعسىپ تۇراتىن. ءمانسابى بولماسا دا قادىرى بار سيلى اقساقالىمىز بولىپ قالماستان، اعايىن-تۋىس، دوس–جاراندار مەن جاستاردىڭ اقىل سۇرار قورمالدارىنىڭ ءبىرى بولدى. بوقاي رۋى ورتاسىندا عانا ەمەس ءبۇتىن اقشي قالاشىعىندا وزىندىك بەدەلى بار، اۋىلدىڭ باتا تىلەر دۋالى اۋىز قارتى بولىپ، 90 عا تاياعان كەزىندە دە كوپتىڭ تىلەگىنىڭ قۋاتى بولار 70 جاسىنداعىنداي سەرگەك، اقىل–وي قۋاتى باياعسىنداي، كوڭىلدى تۇرمىس كەشىرىپ، 2018-جىلى 11-اي 5-كۇنى اۋىرىپ دۇنيەدەن وزىپ، اقشي قالاشىعىنىڭ باتىس وڭتۇستىگى كەمەر ۇستىندەگى كونە زيراتتىقتاعى بۇرىن قايتىس بولعان ايەلى قاينىش ءبيقان قىزى قورعانىندا كەزىندە وزىنە ارناپ قالدىرعان ورىنعا جەرلەندى.