1931-جىلى قابانىڭ ەرتىس بويىندا تۋىلعان.قىزىلقايىڭ مەكتەبىنەن باستاۋىش،ورتالاۋ وقىپ، 1950-جىلى وقىتۋشىلىقتى باستاعاننان كەيىن ەكى رەت مۇعالىمدەر كۋرسىنا قاتىناسىپ ، ورتا تەحنيكۋم ورەسىنە جەرتكەن.جۇڭگو كوممونيستىك پارتيا مۇشەسى،كاسىپتىك اتاعى «جوعارى داەجەلى وقىتۋشى». 1950-جىلدان 1993-جىلى زەينەتكە شىققانعا دەيىن باستاۋىش مەكتەپ وقىتۋشىسى ، اۋداندىق وقۋ-اعارتۋ بولىمىندە اعارتۋ ينسپەكتورى، مەكتەپ باستىعى قاتارلى قىزمەتتەردە بولعان.1959-جىلدارى باستالعان سولاقاي قيمىل تۇسىنان باستاپ شەتكە تۇرىپ، جازىقسىز تۇردە ون نەشە جىل اۋىر سوققى كورگەن.پارتيا 11-كەزەكتى ورتالىق كوميتەتى ءۇشىنشى جالپى ماجىلىسىنەن كەيىن اقتالىپ، ءوزى سۇيەتىن وقۋ-اعارتۋ سلاسىنا ورالعان.ازاتتىقتىڭ باستاپتى كەزىندە اۋدانىمىزدىڭ قيىنشىلىقتى شارت-جاعدايداعى ، كەنجەلەگەن ۇلتتىق اعارتۋىن جاقسارتۋعا بەلسەنە ىستەپ كوزگە تۇسسە، قالپىنا كەلگەننەن كەيىن تاعى دا «مادەنيەت توڭكەرىسىنىڭ» بىلىقپالىعنا ۇشىراعان اۋىل-قىستاق وقىتۋ،مەكتەپ باسقارۋ ىستەرىن ساپالاندىرۋعا بارلىق ىنتاسىمەن تەر توكتى. ۇكىمەت پەن بۇقارا ونىڭ جاپالى ،ادال ەڭبەگىن جوعارى باعالاپ،«وزات وقىتۋشى»،«ۇزدىك مەكتەپ باستىعى»قاتارلى سيلىقتارمەن بىرنەشە رەت ماراپاتتالدى.ول جاسىنان حالىقتىق فولكلورعا قىزىعىپ ، ەل ىشىندەگى اتا-بابالاردان جالعاسقان تاريحي دەرەكتى ايالاپ ،كەينگىگە ادالدىقپەن جالعاستىرۋشى. الدىڭعى بۋىنداردان تىڭداپ،ساقتاعان تاريحي اڭگىمە-بولىمىستاردى اسىرىپ-جاسىرماي، ءوز قالپىندا دۇرىس جەتكىزىپ كەلگەن«تاريحشى قارت».