ينتەرنەتتىك ادەبيەتكە ەلەۋسىز قاراۋعا بولمايدى

مو يان


  مەن ءۇشىن ينتەرنەتتىك ادەبيەت مۇلدە بەيتانىس ءبىر دۇنيە ەدى، ءتىپتى ىشتەي وعان جاۋلىق پيعىل ۇستانعانىمدى دا جاسىرمايمىن. ءبىراق، ينتەرنەتتىك ادەبيەتتىڭ ەلەۋسىز قاراۋعا بولمايتىن قۇبىلىس ەكەنىن اقىرى مويىندادىم، قازىرگى جۇڭگو ادەبيەتىن تانۋ، زەرتتەۋ ماسەلەسى ينتەرنەتتىك ادەبيەتتەن اينالىپ وتە المايدى. ەگەر قازىرگى جۇڭگو ادەبيەتىنە باعا بەرۋگە تۋرا كەلسە، ينتەرنەتتىك ادەبيەتتى قاعىس قالدىرۋعا استە بولمايدى.

  ءبىر مەزگىلگە دەيىن، ينتەرنەتتىك ادەبيەت پەن ءداستۇرلى ادەبيەتتىڭ اراسى سالقىن بولىپ كەلدى، بەينە ءداستۇرلى جازۋشىلاردىڭ شىعارمالارى عانا ناعىز كوركەم ادەبيەت ساناتىندا سياقتى دا، ينتەرنەت جازۋشىلارىنىڭ تۋىندىلارى وقۋعا جەڭىل، ارزانقول بىردەڭەلەر سەكىلدى. دەگەنمەن، ۋاقىتتىڭ وتۋىنە بايلانىستى، كوركەم ادەبيەت پەن جەڭىل ادەبيەتتىڭ، ءداستۇرلى جازۋشىلىق پەن ينتەرنەت جازۋشىلىعىنىڭ ارا جىگى بىرتە - بىرتە ءدۇدامال تارتا باستادى، ەكەۋىنىڭ اراسىنا سوعىلعان قابىرعا تامنىڭ قازىر ءىزى دە جوق.
  تام دەگەننەن شىعادى، بالا كۇنىمدە ءبىزدىڭ اۋىلداعى تام ۇيلەردىڭ بىرەر قابىرعاسى قالايدا ماپ - مايدا، جاپ - جالتىر بولىپ كەلۋشى ەدى. ەگەر بىرەۋ ءوز ءۇيىنىڭ ارتقى قابىرعاسىن اقتايتىن بولسا، بىرەر كۇن وتپەي قابىرعا بەتى ادەبيەتكە اۋەس بالاقايلاردىڭ ولەڭى مەن اڭگىمەلەرىنە تولىپ كەتەتىن. «پالەن مەن تۇگەن جاقسى بولىپ ءجۇر» دەپ جازىلسا، ونى ماحاببات تاقىرىبىنا ارنالعان حيكايات دەپ؛ ال «پالەنباي تۇگەنبايدىڭ ۇيىنە قوناققا بارىپ، ەتكە تويىپ، اراققا بوگىپ قايتىپتى» دەپ كەلسە، ونى جەمقورلىققا قارسى وتكىر اڭگىمە دەپ ءبىلىڭىز. ينتەرنەتتىك ادەبيەتتىڭ بوستاندىق دارەجەسى ءبىزدىڭ بالا كۇنىمىزدەگى مىجىرايعان تام ۇيلەردىڭ قابىرعاسى سياقتى. البەتتە، ول قابىرعا بەتىنەن الدە قايدا كەڭ جانە ەركىن، كوڭىل تۇكپىرىندەگى سەزىمدى ەمىن - ەركىن اقتارۋعا مۇمكىندىگى بار ەكەنىن ەسكەرگەندە، ەكەۋىن بارانداس دەۋگە بولادى.
  كوپ جىلدان بەرى ادەبيەت وقىتۋى دا تالاي تالاس - تارتىسقا تامىزىق بولىپ كەلدى. جازۋشى مەن اقىندى تاربيەلەپ جەتىلدىرۋگە بولا ما؟ مەنىڭ ويىمشا، جەر بەتىندەگى ۋنيۆەرسيتەتتەردىڭ كوپشىلىگى كوركەم ادەبيەت فاكۋلتەتىن بەكەرگە اشىپ وتىرعان جوق، ادەبيەت اۋەسكەرلەرىن تاربيەلەيتىن ارنايى جازۋشىلىق كۋرستارى قانشاما، قانشاما ادامعا ادەبيەتتانۋ ماماندىعى بويىنشا عىلمي اتاقتار بەرىلىپ جاتىر. وسىنىڭ ءوزى ادەبيەتتە وقۋعا، سويلەۋگە، ۇيرەنۋگە ءتيىستى مازمۇنداردىڭ بار ەكەنىن راستايدى، مىنە، ينتەرنەتتىك ادەبيەت ۋنيۆەرسيتەتىنىڭ اشىلۋىنىڭ ۇلتاندى سەبەبى دە وسى. مەن بەگزاتتىق ءبىلىم ورداسىنا تالاي باردىم، اۋلانىڭ وڭتۇستىك شىعىس مۇيىسىندەگى بىتىكتاستار كەشەنىندە ميڭ، چيڭ اۋلەتتەرى تۇسىندا كىجۇي ەمتيحانىنىڭ ءبىرىنشى دارەجەسىنەن وتكەن ادامداردىڭ ءتىزىمى جازىلعان تاس ەسكەرتكىش تۇر. بارسام بولدى ءتىزىمنىڭ اراسىنان ءبىزدىڭ گاۋمي اۋدانىنىڭ تۋمالارىنىڭ اتىن ىزدەيمىن، قازىرگە دەيىن ون نەشەسىن تاپتىم. اۋدان شەجىرەسىندەگى دەرەكتەرگە قاراعاندا، كىجۇي ەمتيحانى جولعا قويىلعاننان كەيىن، گاۋميدەن جيىنى 190 ادام كىجۇي ەمتيحانىنىڭ ءبىرىنشى دارەجەسىنەن سۇرىنبەي وتكەن ەكەن. ولارعا دا وڭاي تۇسپەگەن بولۋ كەرەك، قانشاما ازاپ شەگىپ، قانشا شاپاننىڭ جەڭىن توزدىرعاندا عانا «التىن تىزىمگە» اتى ءىلىنىپ، تاس ەسكەرتكىشكە ەسىمى قاشالدى ەكەن. بۇگىنگى تاڭدا، ينتەرنەت پاراقشالارىنا دۇركىرەتىپ جازىپ جۇرگەندەر بارشىلىق، ءبىراق ءتۇپتىڭ تۇبىندە كوركەم ادەبيەتتىڭ ءزاۋلىم ەسكەرتكىشىنە اتى ويىلىپ جازىلاتىندار قالايدا نەكەن - ساياق. سوندىقتان، ادەبيەتكە كەلگەن جاس تالاپتار جاسامپازدىقتىڭ قىر - سىرىن بابالارىمىز سەكىلدى اسقان قايرات، ۇلكەن ىجداعاتپەن ۇيرەنۋگە مىندەتتى، مىنە، سوندا عانا تابىس جولى اشىلادى.
  ينتەرنەتتە وزىندىك شىعارماشىلىقپەن اينالىسىپ جۇرگەن ادەبيەت جان اشىرلارىن تاربيەلەۋ ماقساتىنداعى ەلىمىزدىڭ العاشقى ينتەرنەتتىك ادەبيەت ۋنيۆەرسيتەتى 30 - قازان بەيجيڭدە شاڭىراق كوتەردى. اتالعان ۋنيۆەرسيتەت ءىرى ادەبيەت سايتتارىمەن بىرىگە وتىرىپ، بۇكىل ەلدەگى ينتەرنەت جازۋشىلارىنا تەگىن ساباق وتەدى. نوبەل سيلىعىنىڭ يەگەرى، جازۋشى مويان ۋنيۆەرسيتەتتىڭ قۇرمەتتى باستىعى بولىپ تاعايىندالدى. بۇل ۋنيۆەرسيتەتتىڭ اشىلۋ سالتاناتىندا موياننىڭ سويلەگەن ءسوزىنىڭ ءبىر ۇزىگى.

  «حالىق گازەتى» (2013 - جىلى 31 - قازان)


قاتىستى باعالار

  加载评论内容,请稍等......