قۇماربەك ساقارين-80 جىل
قۇماربەك ساقارين، مەن جانە داستانعا بەرگىسىز ءبىر ولەڭ(7-سان) (ەسسەلەر)

[ءارىبى:ۇلكەن ورتا كشكەنە]

سەرىك قاۋىمباي ۇلى
كورنەكتى تىلگەر، كوپ ءتىلدى اۋدارماشى، پەداگوگ، اقىن، جازۋشى، سىنشى سەرىك قاۋىمباي ۇلى 1982-جىلى تۇڭعىش شىعارماسى «مۇقامەت پەن سارا» اتتى داستانىمەن ادەبيەت مايدانىنا قادام تاستادى. سونان بەرى ول 500 گە تارتا ولەڭ، «بابالارعا تاعىزىم»، «سارىعىن باسۋ»، «كومەسكى تىزگىن»، «مەكەن تەبۋ» قاتارلى 20 نەشە داستان، «ءتىل اشار»، «التىن قوڭىراۋ»، «اق مارجان»، «اق قاينار» قاتارلى ولەڭ كىتاپتارى شىعىپ، اقىن سيپاتىمەن بوي كورسەتتى. ونىڭ ۇستىنە، مۇندا اتالعان ولەڭدەر مەن داستانداردان تىس، بۇل ءتورت ولەڭ كىتاپ ءبىر تۇتاس بالالارعا ارنالدى. «اق مارجان»دا بالالارعا ارنالعان ولەڭدەر، كالامبۇرلار، اناگرامالار، شارادالار، مازاقتامالار، جۇمباقتار، جاڭىلتپاشتار جانەءسوز وينى، اندەمە سياقتى بۇرىن كوپ كەزىگە بەرمەيتىن جانىرشالار بەرىلىپ، بالالاردى تاپقىرلىققا جەتەلەپ وتىرعان. ال، «اق قاينار»دا ساۋات اشار، ەسەپ ولەڭ، ساناماقتار، سيفىر سوزدەر، اندەر، وتىرىك ولەڭدەر، ايتىستار سياقتى جانىرشالار بەرىلىپ، بالالاردى وقۋ- بىلىمگە ىنتالاندىرعان. وسىعان جالعاي بۇرىن مۇلدە كەزىگە بەرمەيتىن ەمىلە ولەڭ، تەرمين ولەڭ، ەرەجە ولەڭ جازبالارى ارقىلى الدىڭعى دارىپتەمەلەرىن ونان ارى تەرەڭدەتتى، بيىگىنە شىعاردى. اسىرەسە، اۆتور جاعىنان تاپقىرلانعان تۇلىك جىرى، مۇلىك جىرى، اس- سۋ ولەڭ، دىبىستار، اكرو تورتتاعاندار ءوز الدىنا ءبىر توبە. بۇل جاعىنان ول بالالار ادەبيەتشىسى سيپاتىمەن بوي كورسەتەدى.
1983-جىلدىڭ سوڭىن الا «اندەۋ»، «اڭقيۋ» اتتى العاشقى اڭگىمەلەرىن جاريالادى. سونان بەرى 100 گە تارتا اڭگىمە، «اق سايتان»، «اق پەرىشتە»، «قۇيىندى قابىر» اتتى اڭگىمە-پوۆەستەر جيناعىن؛ «جاكە ءبي»، «ءبورىبايدىڭ ۇلى»، «اق جىلان»، «اجەلى بالا»، «تۋمىس پەن جازمىش» اتتى كوپ تومدى روماننىڭ 5 كىتابىن جاريالاپ جازۋشى سيپاتىمەن ەل كوزىنە ءتۇستى. «تۋمىس پەن جازمىش»رومانى 2 كىتابى بىلتىر  ورتالىق راديو ستانسياسىندا وقىلدى. 1-،2-،3-، كىتابى 2015-جىلى مەملەكەت بويىنشا از ساندى ۇلتتاردىڭ تاڭدامالى 100 كىتابىنىڭ ىشنە كىردى. بۇل جەردە «تۋمىس پەن جازمىش» ەلىمىز پروزاسىندا داۋىر بولگىش قاسيەتكە يە اسا كورىنەكتى شىعارما ەكەندىگىن ەرەكشە اتاپ وتكىمىز كەلەدى. ونداعى ءتىل جۇيرىكتىگى، ءتىل بايلىعى، پالساپالىق، رۋحانيالىق، ادامزاتتىق دەڭگەيدەگى اقىل-ەس، ادامنىڭ ىشكى پسيحيكالىق كۇيى، ادام ماحابباتى مەن ەمىرەنگەن ەزىلگىشتىك، ادام بويىنداعى كۇشتى عاداۋات پەن دۇسپاندىق، ادام مەن تابيعاتتىڭ ەتەنەلىگى، تىلسىم مەن كيەنىڭ ادام رۋحىمەن قاتىسى، ادام بويىنداعى باۋىرمالدىلىق پەن جان سىڭىسىمدىلىگى، ادام بويىنداعى كۇنا مەن اق ادالدىق ورتاسىنداعى كۇرەس جانە كىرىگىمدىك، ءوز بەن وزگەلىك ورتاسىنداعى كومەسكى سايىس ت . ب سونداي كەرەمەت تە ايشىقتى تۇردە بەرىلگەن. توتەسىنەن ايتقاندا بۇل شىعارما وقىرمان ءۇشىن تولىق قاندى ءبىر ۋەنيۆەرسيتەت. 1984- جىلى «پوەزيامىزداعى فورماليزم تۋرالى»، «ادەبيەتىمىزدەگى ناتۋراليزم تۋرالى» اتتى ادەبي سىندارىن جاريالاپ، سونان بەرى 200 گە تارتا سىن-زەرتتەۋ ماقالاسى مەن «اق جاۋىن» اتتى سىن-زەرتتەۋ كىتابىن شىعارىپ، سىنشى-زەرتتەرمەن تۇرعىسىنان بوي كورسەتتى. «اقىلدىڭ اقىنى  اقىت»اتتى زەرتتەۋ كىتابى ورتالىق راديو ستانسياسىندا وقىلدى، الدا كىتاپ بولىپ شىقپاق.«تىل تازالىعى---رۋح تازالىعى»اتتى كىتابىنىڭ 1-بولىمى ورتالىق راديو ستانسياسىندا وقىلدى.
1990-جىلداردىڭ سوڭىن الا «جىلان تاس»، «مەڭىرەۋدەن شىعا بەرە» قاتارلى اڭگىمەلەردى حانزۋ تىلىنەن اۋداردى. سونان بەرى 30 نەشە اڭگىمە، 10 مىڭ جولدان اسا ولەڭ اۋدارىپ اۋدارۋشى سيپاتىمەن بوي كورسەتتى. ول جانە مۇرات ومكين دەگەن اتپەن «جامان وقۋشى بولمايدى، جامان وقىتۋشى بولادى»، «بالاڭىزدىڭ قانداي مىنەز قالىپتاستىرۋىن اڭسايسىز» قاتارلى 30 عا تارتا پەداگوگيكالىق- مەتوديكالىق ماقالا جاريالاپ، پەداگوگ سيپاتىمەن بوي كورسەتتى.
1990-جىلداردىڭ سوڭىنان باستاپ تىلگەرلىكپەن اينالىسىپ، تەك ءتىل جونىنەن 150 گە تارتا ماقالا جاريالاپ، ەلىمىزدەگى تىلگەرلەر اراسىندا ۇلكەن دابىرا تۋدىردى. اسىرەسە، ونىڭ «ءسوز ساندىققا سياپات» اتتى جەلىلەس 24 ماقالاسى مەن «ءتىل تازالىعى−رۋح تازالىعى» اتتى جەلىلەس 61 ماقالاسى ەلىمىزدەگى تىلگەرلەر ءۇشىن زەرتتەۋ سالاسىنداعى ادەمى باستاما بولدى. ونىڭ ءوزى حات تانىعاننان باستاپ جيعان سوزدەرىنەن قالتاسىندا سوزدىكتەردەن تابىلا بەرمەيتىن ءجۇز مىڭنان استام ءسوز بار. مۇنى كەزىندە باتىرقان قۇسبەگين، مادەنيەت مۇقاتاي ۇلى، شاكەن بوكەتاي ۇلى قاتارلىلار باسپا بەتىندە تىلگە العان بولاتىن.
وسى سالادا تالماي ەڭبەكتەنگەن ازامات قازىر ۇيعۇر، قىرعىز، وزبەك، تاتار، شاعاتاي، تۇرىك تىلدەرىنەن اۋدارما جاساۋمەن بىرگە، 20 نەشە تىلدەن ماتەريالدىق تۇرعىدان تىكە پايدالانا الادى.
سەرىك قاۋىمباي ۇلى ءتۇرلى جانردى قامتىعان 21 كىتابى مەن «اتىراۋ»، «كوش جولىندا»، «كۇن كۇلىمدەگەندە»، «ماحاببات قۇرباندارى»، «گۇل داۋرەن» قاتارلى بەس الماناعىن باسپادان شىعارعان.
ول جوڭگو جازۋشىلار وداعىنىڭ، جوڭگو از ۇلت جازۋشىلارى عىلمي قوعامىنىڭ، شينجياڭ جازۋشىلار وداعىنىڭ مۇشەسى. 7-، 8- كەزەكتى شينىجياڭ قازاق- قىرعىز ادەبيەتى «ءدۇلدىل» سيلىعىنىڭ يەگەرى.
1

1982-جىل. جاز. «ماحاببات قۇرباندارى» اتتى الماناقتا مەنىڭ تۇڭعىش شىعارمام «مۇقامەت پەن سارا» اتتى داستانىم جاريالانىپ، ەندى تاريحقا اتىم قالدى دەگەن ەنەكوكىرەك جەلىكپەن جەر-سۋعا سيماي جۇرگەن كەزىم. قيۋادان قيسىنىپ، قابانىڭ نارىن جايلاۋىندا كەزەكتى ءبىر اقىندار بايقاۋى وتە قالماسى بار ما؟! مىنە، سونان بەرى تابانى كۇرەكتەي 41 جىل بولىپتى. دەمەك، ءبىر داستانى جاريالانىپ، وزىنەن بۇرىنعى ۇلى تۇلعالارمەن تەرەزەسى تەڭەسكەندەي بولىپ، جەلىگىپ جۇرگەن بالاڭ اقىننىڭ ابدەن سارقايراقتانىپ، بۇل سالانىڭ ىستىعى مەن سۋىعىنا كۇيىپ، قىزىعى مەن شىجىعىنا مەيىلىنشە توعىتىلعان بۇل كۇندەردە، ەندى ارتىنا بۇرىلىپ، قايىرىلا قاراعاندا، كوزىنە تۇسكەنى، ءدال كەزىندەگى ءوزى سياقتى ءبىر داستانى نەمەسە ءبىر كىتابى جۇرتپەن بەت كورىسىپ، تاريحقا اتى قالعان ”ۇلى تۇلعالار؛ بولدى. يا، بۇعان كۇلۋگە بولمايدى. تاعى دا ءبىر وتىز، قىرىق جىل وتكەن سوڭ، ولار دا مەن قۇساپ ساباسىنا تۇسەدى. بۇل ءوزى ءار ءبىر بالاڭ كۇيدەگى پەندەلەردىڭ باسىنداعى ورتاق كۇي عوي. ادەبيەت دەگەن ناعىز تالانتتاردى شىڭاپ شىعاراتىن دومىنا پەش ەمەس پە. وعان تۇسپەگەن ادام نەنى ءبىلسىن؟! كەشىرىممەن قاراۋعا بولادى!!
سونىمەن، نە بولسا، و بولسىن، سول ۇلى تۇلعالارمەن تەرەزەسى تەڭ جەلىكتى كۇيمەن مەن دە نارىن جايلاۋىنا تارتتىم دا كەتتىم.
ول كەزدەگى اقىندار بايقاۋى كەيىنگى كەزدەردەگى سياقتى دەنە تاربيە قيمىلى تەكتەس قويىرتپاق كۇيدە ەمەس، تازا ءبىر ءتۇستى مەرەكەلى قيمىل تۇرىندە عانا وتكىزىلۋشى ەدى. ونىڭ ۇستىنە، قيمىل بارىسى ءبىر اپتاعا جۋىق بولاتىن. سونىڭ كەزەكتى ءبىر كۇنى، ءبىر جەردە اقىندار ايتىسىپ، ءبىر جەردە بالۋاندار ارىسقا ءتۇسىپ، ەندى ءبىر جەردە ات بايگەسى بولىپ جاتقان. ال، مەن ادەبيەت مايدانىنىڭ جاڭا پەرى، جەلىكتى ءدۇلدۇلى، وزىممەن-ءوزىم بولىپ، وزىمشە ۇلى جاراتىلىس قوينىنا ىشكەرلەي سۇڭگىپ، قىلاياعى گۇلگە قونعان كوبەلەكتىڭ قيمىلىنا دەيىن ءساپ سالىپ، شابىت قۋىپ جۇرگەم.
كەنەت، بايگە مايدانى جاقتان ماعان بەلگىسىز ءبىر شۋ-شۇرقان كوتەرىلدى دە، ءار مايدانداعى جۇرت، بايگە مايدانىنا قاراي كيمەلەسە جۇگىردى.
بۇل قيمىل مەنى قيال دۇنيەسىندەگى جاراتىلىس قۇشاعىنان سۋىرىپ الىپ، سولاي قاراي لاقتىردى دا جىبەردى. ال، جۇگىر. قالىڭ كوپتىڭ شەگىنە ىلىنە بەرىپ، ءبىر اۋىل بالاسىنا جولىقتىم. الاساپىران قيمىل باستالعاننىڭ الدىندا مىزگەننەن ءبىر جايسىز داۋىس ساڭق ەتە تۇسكەن. ونى جاراتىلىس قۇشاعىنا ءسىڭىپ كەتكەن مەنىڭ قۇلاعىم دۇرىس قابىلداماعان ەدى.
-نە بولىپ كەتتى؟-دەدىم الگى بالاعا جەتە بەرىپ.
-بىلمەيىم،-دەدى بالا كوزى باقىرايىپ.
-الگىندە مەزگەندە نە دەدى، ۇعا الدىڭ با؟
- باي اتا ءولدى دەدى مە؟ بىردەمە...
-نە دەيدى مىناۋ؟...
جۇرەگىم تاس توبەمە شىقتى.
جۇگىرىپ كەلەم. ازدان سوڭ مەن دە جۇرت ىشىنە سۇڭگىپ كەتتىم.
-ياپىراي، بابى كەلمەي قالدى ما، جوق الدە باسقا بىردەمە بولدى ما؟ ناعىز ءدۇلدىلدىڭ ءوزى ەدى،-دەدى بىرەۋ تۇرعان ورنىندا شىرق اينالىپ.
”ە،ە، بايگە ات ولگەن ەكەن عوي، الگى جۇگىرمەكتىڭ «باي اتا» دەپ جۇرگەنى وسى ءسوز بولدى؛ دەدىم ىشتەي جۇرەگىم ەندى ورنىنا تۇسكەندەي بولىپ. جۇگىرمەكتىڭ قۇلاعىنىڭ تەرىس قابىلداعانىن قاراشى.
سونىڭ اراسىنشا مىزگەننەن ءبىر تانىس داۋىس ساڭق ەتە ءتۇستى. قۇماربەك ساقاريننىڭ داۋىسى؛
جۇيىرىك ات ولگەندە
ءولدى جۇيىرىك باتىرىپ ءبىر كۇيىككە،
كوز ءتيىپ پە، كىم ءبىلسىن، ءتىل تيىپ پە؟
ءيت پەن قۇسقا جەم قىلماي ساڭلاعىڭدى،
اپار باسىن قادىرلەپ ءىل بيىككە!

ول جۇگىرىپ اڭسادى الىستى ناق،
بالكىم نامىس شىداتتى شابىسقا ۇزاق.
يەسىنىڭ ءۇمىتىن اقتاپ بولعان،
جاتىر ماڭگى دەم الىپ قامىس قۇلاق.

باپتاعان ەد يەسى ەركىن ونى،
جەردەن شىققان دەلىنگەن جەر تۇلەگى.
جازىعىندا نارىننىڭ ءتورت تۇياقپەن،
اقتاناۋدىڭ شابىسىن شەرتىپ ءولدى.

بۇل ەلدىڭ ەمەس جالعىز جۇيىرىگى وسى،
قايعىر ما ولگەن اتتىڭ كىم يەسى؟!
جۇيىرىك قۇلىن تاعى دا تۋار سونداي،
جىلقى وسىرگەن اۋىلدىڭ ءبىر بيەسى.

كۇيىنەتىن سالتىڭ-اۋ قازاق اتقا،
ءبىر جىلقى ءۇشىن تۇسپەشى ازالى وتقا!
ءدال وسى اتتىڭ ءولىمىن بەرسە ارمان نە؟
ارمانى كوپ ەلدەگى ازاماتقا!
بۇكىل نارىن دالاسى سىلتىدەي تىنىپ قالعان. قۇس ەكەش قۇستىڭ داۋىسى دا كىرمەي قالعان مەنىڭ قۇلاعىما.
ولەڭ اياقتادى.
سونان ارى جۇرت بىرىنە-ءبىرى ءسوز بەرمەي دۋىلداي باستادى.
-ناعىز اقىن دەپ وسىنى ايت.
-قۇددى ءبىر وسى ۋاقيعانىڭ تۋىلارىن ءبىلىپ، الدىن الا دايىنداپ جازىپ قويعانداي.
-اۋىزشا ايتىپ تۇرعان سياقتى.
-پاي! پاي! مۇنداي شابىت ساندا ءبىر اقىننىڭ عانا قولىنان كەلەدى.
-قارا سوزبەن ايتساڭ دا مۇنداي ورىن-ورنىنا تۇسە قويماس ءسوز دەگەن.
جۇرت بىرتەلەپ ءار مايدانعا قاراي تاراي باستادى.

2

اقىن تابيعاتى- جاي ءبىر پەندەنى قويىپ، رۋح الەمىنىڭ سويىنان تۇسىنگەندە اقىننىڭ وزىنە دە دۇرىستاپ تانىستىق بەرە قويمايتىن، اسا ءبىر عاجايىپ قۇبىلىس. سولاي دەگەن كۇننىڭ وزىندە دە، اشالاپ ايتساق، وسىنىڭ ءوزى ەكى ءتۇرلى باعىتپەن داميدى. سونان بارىپ، پەندەلەر الەمىنىڭ يتپەگىندە، اقىندار شارتتى تۇردە ۇلكەن ەكى جىككە بولىنەدى. مۇنىڭ ءبىرى؛ تۋمىسىندا بار، سويىنا بىتكەن اقىندىق. مۇنداي اقىندار تەك شابىتىمەن عانا كۇن كورەدى. وزىندىك تۇسپەسى بولادى. ەندى ءبىرى؛ تەحنيكالىق اقىندار. ولار ولەڭ جاساۋدىڭ جولىن، قاعيداسىن، تارتىبىن، ءريتىمىن بىلەدى. سوعان سۇيەنىپ ولەڭ جاسايدى. ونداي ولەڭدەردە جان بولمايدى. سەزىم بولمايدى. رۋح بولمايدى. تەك بولىمسىز عانا ديداكتيكا بولادى. ەڭ عاجابى؛ سول بولىمسىز ديداكتيكاسى كوپتەگەن ادامداردىڭ باسىن اينالدىرادى. ءتىپتى وزىنە تابىندى ەتەدى. مىنە، بۇل سوڭعى اقىنداردىڭ سايران سالار شەت-شەپىرسىز الىپ دالاسى.
قۇماربەك ساقارين مىنە وسىنىڭ العاشقىسى. ونىڭ اقىندىعى تۋمىسىندا بار. سونان دا، ونىڭ اقىندىق شابىتى، وسىناۋ اقىندار بايقاۋى باستالعان كەزدەن باستاپ-اق، ءوزىنىڭ گوي-گويلى شەگىنە جەتىپ العان. ءىس جۇزىندە «جۇيىرىك ات ولگەندە» اتتى بۇل ولەڭ، ونىڭ تۋمىس شابىت مايدانىندا باسقا تاقىرىپپەن جىرلانىپ، باسقا مازمۇندا ءورىلىپ كەلە جاتقان بولۋى ابدەن مۇمكىن. سول شاقتا اقىننىڭ بايگە مايدانىندا جۇرت كوزىنە كورىنىپ قۇر قاڭقاسى عانا وتىرعان دا، رۋحى سول بايگەدەگى اتتارمەن بىرگە شاۋىپ جۇرگەن. اۋەل دەسەڭىز، سول اقتاناۋدىڭ جالىندا بىرگە ويناپ كەلە جاتقان دا بولۋى مۇمكىن. ولەڭ مىنە وسى كەزدە اقتاناۋدىڭ ءتورت تۇياعىنىڭ ريتىمىمەن بىرگە اقىن ميىندا الگىندەگى بىزگە ەندى مۇلدە تانىستىق بەرمەيتىن كومەس تاقىرىپپەن ءورىلىپ كەلە جاتقان دا، اقتاناۋمەن بىرگە بايگە مايدانىنىڭ سوڭعى شەگىندە جۇرت كوزىنەن مۇلدە كومەس كۇيدە ءۇزىلىپ تىنعان. سونىمەن، «جۇيىرىك ات ولگەندە» دەگەن ولەڭ بارلىققا كەلگەن. مىنە، بۇل ولەڭنىڭ تۋۋ بارىسىنا ساكىن.
ەندى ءبىز ولەڭنىڭ قۇرىلىمىنا كەلەيىك؛
ولەڭ بار بولعانى بەس كۋليت، جيىرما تارماقتان تۇرادى. سونىڭ وزىندە وسىناۋ شاپ-شاعىن ولەڭنىڭ ءتورت بولەكتەن قۇرالىپ، تۇپ-تۋرا ءبىر داستاننىڭ جۇگىن ارقالاپ تۇرعانىن بىلگەن كىم بار؟؟
ءبىرىنشى بولەك؛
ءولدى جۇيىرىك باتىرىپ ءبىر كۇيىككە،
كوز ءتيىپ پە كىم ءبىلسىن، ءتىل ءتيىپ پە؟
ءيت پەن قۇسقا جەم قىلماي ساڭلاعىڭدى،
اپار باسىن قادىرلەپ ءىل بيىككە. ءتورت تارماقتان تۇراتىن بۇل بولەكتە ەسكى قازاقتىق سالت، داعدى يدەيال دارەجەسىندە تۇر. بۇل اقىننىڭ «تورقاسقا» داستانىنداعى يدەيالدىق قويىلىمىنداعى دارىپتەمەسىمەن مۇلدە پارىقتالادى. سەبەبى؛ بۇل ەكەۋى ناتيجەسى بىرەۋ بولعانىمەن، سەبەبى باسقا-باسقا ەكى تاعدىردىڭ تۋىندىسى. تورقاسقا وتانىن، جەرىن، حالقىن قورعاۋ ءۇشىن بولعان قان مايداننىڭ قۇربانى دا، اقتاناۋ سالت پەن داعدىنىڭ داستۇرلىك تايتالاسىنىڭ قۇربانى. سونان دا، اقىن تورقاسقانى ادامشا جەرلەپ وتىر دا، اقتاناۋدى بايىرعى داستۇرلىك سالتىمىز بويىنشا «اپار باسىن قادىرلەپ ءىل بيىككە!» دەپ وتىر. تورقاسقانى قالايشا ادامشا جەرلەدى؟ ونى بىلگىسى كەلگەن ادام مەنىڭ «قۇماربەك ساقاين، مەن جانە اقىننىڭ ساراسى» دەگەن ماقالامدى وقىسا بولادى.
ەكىنشى بولەك
ول جۇگىرىپ اڭسادى الىستى ناق،
بالكىم نامىس شىداتتى شابىسقا ۇزاق.
يەسىنىڭ ءۇمىتىن اقتاپ بولعان،
جاتىر ماڭگى دەم الىپ قامىس قۇلاق.

باپتاعان ەد يەسى ەركىن ونى،
جەردەن شىققان دەلىنگەن جەر تۇلەگى.
جازىعىندا نارىننىڭ ءتورت تۇياقپەن،
اق تاناۋدىڭ شابىسىن شەرتىپ ءولدى. سەگىز تارماقتان تۇراتىن بۇل بولەكتە جۇيىرىكتىڭ سويى مەن سيپاتى تۇراقتاندىرىلعان.
ءۇشىنشى بولەك
بۇل ەلدىڭ ەمەس جالعىز جۇيىرىگى وسى،
قايعىر ما ولگەن اتتىڭ كىم يەسى؟
جۇيىرىك قۇلىن تاعى دا تۋار سونداي،
جىلقى وسىرگەن اۋىلدىڭ ءبىر بيەسى. ءتورت تارماقتان تۇراتىن بۇل بولەكتە اقىن جۇيىرىكتىڭ يەسىنە تۇپ-تۋرا كوڭىل ايتىپ وتىر. يا، ەركىن ويلاۋدى بىلمەيتىن، داستۇرگە باسى بايلانعان ادامدار ءۇشىن بۇل دا ءبىر كوڭىلگە وڭاي سيا قويمايتىن يدەيال بولۋى ابدەن مۇمكىن. دەگەنمەن، ەڭ ءبىر جاقسى جەرى، ونداي ويسىز ادامدار بۇنى كوڭىل ايتۋ دەپ مۇلدە ويلامايدى. ونىسى دا جاقسى. وسىنىڭ ءوزى جەر بەتىندەگى كوپتەگەن جاقسى نارسەلەردىڭ كۇل پارشاسى شىقپاي امان تۇرعاندىعىنىڭ ءتۇبىرلى سەبەبى.
ءتورتىنشى بولەك
كۇيىنەتىن سالتىڭ-اۋ قازاق اتقا،
ءبىر جىلقى ءۇشىن تۇسپەشى ازالى وتقا.
ءدال وسى اتتىڭ ءولىمىن بەرسە ارمان نە؟!
ارمانى كوپ ەلدەگى ازاماتقا! ءتورت تارماقتان تۇراتىن بۇل بولەك، بۇكىل شىعارمانىڭ قورىتىندىسى. ءدال وسى جەردە ءبىزدىڭ ەسىمىزگە ابايدىڭ؛
”ولەڭ ءسوزدىڭ پاتشاسى ءسوز ساراسى،
قيىننان قيىستىرار ەر داناسى.
تىلگە جەڭىل، جۇرەككە جىلى ءتيىپ،
تەپ-تەگىس جۇمىر كەلسىن اينالاسى؛ دەگەن ءسوزى تۇسە كەتەدى. قيسىن ءسوز ءۇشىن مۇنان ارتىق جيناقىلىق بولماس. ال، ەكى اتتىڭ تاعدىرىنىڭ ەكى ءتۇرلى شەشىمدەلگەنى جوعارىدا باياندالدى. بىراق، ەكەۋىنەن شىعارىلعان قورىتىندىدا مۇلدە بەرىك بايلانعان ءبىر ورتاقتىق بار. ناقتاپ ايتقاندا، اقىن بۇلاردىڭ بىرەۋىن ازامات ەسەبىندە ادامشا جەرلەگەندە، ەندى ءبىرىنىڭ تاعدىرىنان ازامات ارمانىنىڭ بايگەسىن تىلەگەن. وسىدان-اق كورىپ الۋعا بولادى. اقىن اقىل-ويى ءوزى جەتپەكشى بولعان ەڭ سوڭعى شەككە دەيىن جەتكەن. ەستە بولۋ كەرەك. بۇل كوپ ساندى اقىنداردا بولا بەرمەيتىن، وڭايشىلىقتا قولعا دا تۇسپەيتىن، بارلىق اقىندار عانا ەمەس، كۇللى جاسامپازدىق يەلەرىنىڭ ارماندى كومبەسى!!

سوڭى

شىعارمانى وقىعان: جەڭىس ورىنباي ۇلى


دايىنداعان : قيمىلدى ۇيىمداستىرۋ القاسى



جاڭالانعان ۋاقىتى 2022-08-04    1434 قارالعان
ەسكەرتۋ:جاسامپازدىق تۋىندىلارىڭ بارلىق باسپا ۇقىعى قورعالادى ،كەلىسىمنەن وتپەگەندە كوشىرىپ پايدالانۋعا بولمايدى.



فوتولار اندەر

شىعارمالار

باس بەت