اكە مەن بالا
(پوەما)
باقىتبەك قابانباي ۇلى
قاراشا ۇيدەن ءبىر قارت شىقتى جۇگەن الىپ قولىنا،
قۇدىرەتىن سەزىندىڭ بە، اكەلىكتىڭ و مىنا؟!
ءتاتتى ۇمىتپەن، ساعىنىشپەن كوز توقتاتىپ كوپ تۇردى،
جالعىز ۇلدىڭ قالا جاقتان كەلەتۇعىن جولىنا.
ەڭكەڭ قاعىپ، بەلىن باسىپ قارت بەتالدى قىراتقا،
قۇلىنىنىڭ جولىن باعىپ كەتكەن اناۋ جىراققا.
كەشە انا قالاشىلاپ كەلگەندەردەن ەستىدى،
"اۋىلعا كەپ تۇرىپ قايتام،-- دەپتى ۇلى، -- ءبىر اپتا".
اتىن اكەپ ەرتتەپ ءمىندى، قارت تا بۇگىن سەرگەك- تى،
تور بەستىمەن شۇيىنشىلەپ ارالاماق جەر- كوكتى.
قۇس ۇشىرماي توبەسىنەن ەركەلەتىپ وسىرگەن،
ازامات بوپ ۇلى مىنە ساۋ- سالامات ەرجەتتى.
شاپتاپ تارتىپ تورى اتىنىڭ قوس ايىلىن شىم قاداپ،
ءمۇيىز شاقشا ناسىبايدان سالدى ەرىنگە شىمداپ اپ.
قانجىعانىڭ ۇشى ايىرىلىپ كەتكەن ەكەن ەكىگە،
جوندەپ تە الدى جەز مويناقتى كەزدىگىن قارت قىننان اپ.
كوڭىلىندە ءبىر وي تولقىپ تارتتى قارتىم تەبىنىپ،
تورى بەستى دە جەلە باستى، كەلەدى ەكەن نە ءبىلىپ؟!
سالدىرمايدى ساۋىرىنا قامشى تىپتەن پەيىلدى،
يەسىنىڭ كوڭىل كۇيىن تۇرعانداي- اق سەزىنىپ.
زور تەبىنمەن ارتقا تاستاپ سارى جوتا، جونداردى،
ەزۋ تارتىپ كەلەدى قارت باسىپ قيىر جولداردى.
كورشى اۋىلدا بولۋشى ەدى ەرتەدەن ءبىر ماگازين،
سوعان تەزدەن جەتۋدى ويلاپ ۇشقان قۇستاي قومداندى.
مۇنداي بەينە، مۇنداي كوڭىل ايتشى قايدان تابىلماق؟!
جان اكەنىڭ ساعىنىشى ءجۇردى ۇلى ءۇشىن قابىنداپ.
_ ءاي، دۇكەنشى،_ دەدىداعى،_ ۇلىم كەلەد قالادان،
ءتاتتى قۇجىرلارىڭ بولسا، قايتام دەدى ءبارىن اپ.
سالىپ جاتتى قورجىنىنا ورىك، مەيىز، ءتاتتىنى،
قارت اكە ءۇشىن بۇگىن مەرەي، بۇگىن ناعىز شات كۇنى.
سورەدەگى سارى جيەك قول ساعاتتى كورگەندە،
قارت كوڭىلدىڭ ارتا ءتۇستى شارىقتاعان شاتتىعى.
كوڭىل سولاي ارمان قۇسى قولعا قونسا سەمىرەد،
ءدال وسىنداي قول ساعاتتى ون جىل بۇرىن كورىپ ەد.
قىزىقسادا جالعىز ۇلى، الىپ بەرەر دارمەن جوق،
سودان بەرى قول جەتپەگەن ارمان بولىپ كەلىپ ەد.
سونان ءبارىن قورجىنعا ساپ قانجىعاعا بايلانىپ،
مىنا جەردە تۇرعىسى جوق ەندى قارت تا ايلانىپ.
بەتكە الدى قايتار جولدى تورىمەنەن جەلدىرتىپ،
تەز ۇيىنە جەتىپ ۇلىن توسپاق اكە جايلانىپ.
قارت كەتكەندە تاڭنان تۇرىپ كوزى شالعان قاراسىن،
تۇسىنگەن ەد ساعىنعانىن قۇلىنشاعىن، بالاسىن.
"جولىنا ءسات" دەپ تىلەنىپ بەت سيپاعان قارت انا،
"ءاي، شال، _ دەمەي، _ تاڭ بوزىنان قايدا تارتىپ باراسىڭ؟"
وتىن جاعىپ، شايىن اسىپ كوز ساپ شالعاي قيىرعا،
ساۋماق بولىپ انا كەتتى شەلەك الىپ سيىرعا.
"امان- ەسەن كەلسە ەكەن" دەپ ىشتەن تىلەپ تىلەگىن،
"جانىم بوتام" دەپ كۇبىرلەي وزگە وي جوق ميىندا.
بۇزىلماعان وردا ەدى بۇل بەرەكەنىڭ قايماعى،
قارت انانىڭ ويىن ءبولدى ات ءدۇبىرى سايداعى.
ادام دەگەن بۇل ومىرگە بەس- اق كۇندىك قوناق قوي،
ءدال قازىرگى بولعان جايت سونىڭ ەدى ايعاعى.
تاسىر- تۇسىر ات كەلەدى ەرتوقىمى باۋىردا،
قۇددى ءوزىن قۇتقارار جان قالعانداي بوپ اۋىلدا.
قورجىن مەنەن ەردىڭ قاسىن كەلەد كەزەك تەپكىلەپ،
سۋىق حابار بەرەتىندەي كورىنىس قوي بۇل قاۋىمعا.
قايران اكە شىققان سودان دۇكەننەن كوپ جىراقتاپ،
ءتاڭىرىنىڭ سەزبەگەن ەد تۇرعاندىعىن سىناققا اپ.
بەلدەن اسا وسقىرىنىپ تىك شانشىلعان اتىنان،
جالپاق تاستىڭ ءدال ۇستىنە جاتقان ەدى قۇلاپ قاپ.
تور بەستىدە ارتقا قارار ءتوزىم دە جوق، حال دە جوق،
قارت جۇرەكتەن بىقىسىدى سۋ سەپكەندەي جانعان وت.
قاراۋىتىپ قوس جانارى ءتوس قالتاعا قول سالدى،
قارتتىڭ ويى، ۇلىما العان قول ساعاتىم بارما دەپ.
سىرت- سىرت ەتىپ جاتتى ساعات سەكوند سايىن تىقىلداپ
قارتتى كەتتى سول تىقىلمەن ءبىر جويقىن كۇش قىسىمعا اپ.
امال قانشا، جالعىز ۇلىن اڭساپ سوققان جۇرەكتى،
اجال دەگەن ءابجىلان كەپ ارباپ جاتتى ىسىلداپ.
تاعدىر كەيدە وكىنىشپەن ءتۇن قىلاتىن اق تاڭىن،
لەزىمدە بۇلت تورلادى قارتتىڭ اشىق اسپانىن.
ات ۇركىگەن جىراشىقتا قۇبىجىقتاي يلەنىپ،
قارت سەزبەدى جالعىز ۇلدىڭ ۋداي ماس بوپ جاتقانىن!
加载评论内容,请稍等......